KARAKAS- Presidenti i Venezuelës Nicolas Maduro njoftoi se bllokoi përdorimin e rrjetit social X (ish-Twitter) në të gjithë vendin për 10 ditë. Vendimi vjen në kulmin e polemikave e trazirave dhe protestave të dhunshme pas fitores së Maduros në zgjedhjet e fundit presidenciale, të kundërshtuara nga opozita dhe të pa njohura nga shumë vende.
"X nuk do të përdoret në Venezuelë për 10 ditë!", tha Maduro gjatë një fjalimi të transmetuar në televizionin shtetëror.
Kreu i shtetit tha se kishte nënshkruar një rezolutë të paraqitur nga “Conatel”, autoriteti lokal i telekomunikacionit, i cili vendosi të pezullojë qarkullimin e rrjetit social që nxit urrejtje, luftë civile dhe vdekje. Maduro dhe Musk kanë debatuar shpesh në X, me pronarin e platformës që e krahason presidentin venezuelian me “një gomar”, ndërsa Maduro akuzoi Musk si një forcë shtytëse që qëndron pas protestave.
Pak ditë më parë, manjati dhe presidenti ranë dakord të ndeshen së bashku në ring. Ishte Musk ai që kërkoi diçka të tillë nga politikani, pas rezultatit të zgjedhjeve.
Sipas AP News, autoriteti zgjedhor i Venezuelës e shpalli Maduro-n fitues të zgjedhjeve presidenciale të 28 korrikut me rreth 51% të votave, megjithëse ende nuk ka publikuar të dhënat zyrtare.
Observatori Venezuelian për Konfliktin Social raportoi se të paktën 23 persona (fillimisht u deklarua 24) u vranë gjatë demonstratave. Në ditët pas votimit, protestat shpërthyen në të gjithë Venezuelën dhe jashtë saj, me demonstruesit që bënin thirrje për dorëheqjen e Maduros dhe njohjen e fitores së kandidatit të opozitës Edmundo Gonzalez.
Vende të tilla si Shtetet e Bashkuara, Argjentina dhe Kili kanë refuzuar të njohin fitoren e supozuar të Maduros, në vend të kësaj duke bërë thirrje për transparencë dhe publikim të të dhënave zgjedhore. Bashkimi Evropian ka deklaruar gjithashtu se aktualisht nuk mund ta njohë rezultatin e votimit. Kina dhe Rusia në vend të kësaj uruan Maduron për fitoren e tij. Edhe ministrat e jashtëm të Meksikës, Kolumbisë dhe Brazilit përsëritën, në një deklaratë të përbashkët, thirrjen e tyre ndaj autoriteteve zgjedhore të Venezuelës që të publikojnë të dhënat e votimit./ZËRI
