TIRANË- Kryedemokrati Sali Berisha ka paralajmëruar proteta në vjeshtë. Në një konferencë për mediat, Berisha njoftoi se vjeshta do të sjellë “temperaturat më të larta politike.” Berisha njoftoi se do të ketë një angazhim të fortë për largimin e Ramës duke përdorur çdo mjet, teksa shtoi se në qytete ka protesta të opozitës që janë të organizuara, por jo masive.
Po ashtu, lideri demokrat komentoi edhe foton e publikuar një ditë më parë, ku shfaqej kryeministri Edi Rama me Aleks Soros duke darkuar në jug të vendit. Berisha thotë se Rama ka thirrur për ndihmë Aleks Soros, ndërsa sipas tij, askush nuk ka çfarë t’i bëjë një “kufome të pakallur politike”, siç ai e quan.
“Është thirrur për emergjencë Aleks Soros. Po se çfarë mund t’i bëjë një kufome të pakallur, le ta shohin. Shqiptarët në mënyrë përfundimtare i kanë dhënë verdiktin Edi Ramës. Vjeshta do të jetë vjeshta e temperaturave më të larta politike. Opozita do të jetë e tëra në misionin e saj, largimin sa më shpejt të Edi Ramës, qeverinë kujdestare për zgjedhje të lira dhe të ndershme. Në një seri qytetesh, opozita është në protestë, por këto janë sporadike, të organizuara, por nuk janë masive sa ç’duhet të jenë. Me Edi Ramën, çdo ditë, çdo javë që kalon, Shqipëria shkon thellë e më thellë në krizën e saj.", tha Berisha.
