DURRËS-Ka dështuar mbledhja e fundit e Këshillit Bashkiak Durrës, ku pritej të miratoheshin disa projektvendime që lidhen me rindërtimin. Pa filluar mbledhja opozita e kundërshtoi këtë praktikë, ndërsa bojkoti mbledhjen në shenjë proteste.
Në sallë mbetën vetëm 23 këshilltarë, ndërkohë që kuorumi minimal prej 26 anëtarësh nuk u arrit. Kjo çoi në mbylljen e mbledhjes, pa u shqyrtuar asnjë nga çështjet e planifikuara.
Nuk është hera e parë që mbledhjet e Këshillit Bashkiak në Durrës shoqërohen me tensione mes mazhorancës dhe opozitës. Mbledhja e fundit u shoqërua me debate lidhur me ndryshimin e vlerës së shpronësimit për disa njësi tregtare, të prekura nga projekti i rijetëzimit të zonës arkeologjike pranë Amfiteatrit Antik. Anëtarët e opozitës kanë akuzuar mazhorancën për mungesë transparence ndërsa kanë ngritur shqetësimin se qytetarët po përjashtohen nga e drejta e pronës dhe procesi i rindërtimit. /ZËRI
