TURQI- Kryeministri Edi Rama ka mbërritur në Ankara, ku do të marrë pjesë në Samitin e NATO-s që zhvillohet në Turqi. Kreu i qeverisë shqiptare është shoqëruar nga bashkëshortja Linda Rama dhe delegacioni shqiptar, ndërsa ka marrë pjesë në pritjen dhe darkën zyrtare të organizuar nga Presidenti turk Recep Tayyip Erdogan dhe Zonja e Parë, Emine Erdogan.
Aktiviteti u zhvillua në nder të liderëve të vendeve pjesëmarrëse në samit dhe bashkëshortëve të tyre, si pjesë e axhendës protokollare të takimit të Aleancës së Atlantikut të Veriut.
Gjatë punimeve të samitit, ku marrin pjesë liderët e shteteve dhe qeverive të vendeve aleate, Kryeministri Rama pritet të zhvillojë një takim me Sekretarin e Përgjithshëm të NATO-s, Mark Rutte.
Rama do të marrë gjithashtu pjesë në sesionet e diskutimeve me liderët e vendeve aleate, ku do të trajtohen çështje të rëndësishme për sigurinë dhe mbrojtjen e Aleancës. Ndërkohë që ditën e nesërme, 8 korrik, Rama do të zhvillojë gjithashtu një takim dypalësh me Presidentin e Republikës së Turqisë, Recep Tayyip Erdogan./ZËRI
