TIRANË-Pas rezultateve të zgjedhjeve të 11 Majit situata poltike në vend mbetet e tensionuar. Partia Socialiste festoi dje mandatin e katërt të qeverisjes, duke shënuar historinë në Shqipërinë pluraliste. Pas numërimit të votave, socialistët siguruan plot 83 vende në Kuvendin e Shqipërisë. Partia Demokratike, kundërshtarja kryesore, mori vetëm 50 vendesesioni i ri parlamentar, rezultat ky i cili nuk po pranohet nga opozita.
Partia Demokratike me në krye Sali Berishën ka deklaruar se nuk i njihte zgjedhjet dhe para nisjes së sensionit të ri parlamentar, ka kërkuar ripërsëritje të zgjedhjeve në disa qarqe. Konkretisht PD ka kërkuar në Komisionin e Ankesave dhe Sanksioneve pavlefshmëri të gjithë rezultatit zgjedhor për Kukësin, Beratin dhe Korçën.
Pas ankimit të fundit për Korçën, Ambasadori i Bashkimit Europian në Shqipëri, Silvio Gonzato, i cili ndodhet në këtë qytet komentoi situatën politike në vend dhe qëndrimin e opozitës lidhur me mosnjohjen e zgjedhjeve. Gonazato u shpreh se zhvillimet e fundit nga opozita mund të ndikojë në procesin e integrimit europian të Shqipërisë, por udhëzoi që çdo parti e cila mendon apo ndjen se ka pasur parregullsi, le t’i raportojë ato e të ankohet te organet përkatëse.
Ambasadori i BE kërkoi miratimin e një reformë gjithëpërfshirëse zgjedhore, e cila të përfshijë të gjithë rekomandimet e bëra nga OSBE/ODIHR. Ai tha se qeveria i ka numrat për të ndërmarrë një reformë kaq të gjerë.
Deklarata e Ambasadorit Silvio Gonzato:
Pyetje: Si i shihni zgjedhjet e 11 Majit sipas raportit të OSBE ODHIR?
Gonzato: Nuk e di nëse kanë dalë rekomandimet përfundimtare, por natyrisht që kam parë rekomandimet paraprake. Ka patur gjithashtu një deklaratë shumë të qartë nga Brukseli dhe është një element që unë dua ta përmend, që unë e kam shumë kryesor siç e ka thënë dhe përfaqësuesja e lartë Kalas, është koha tashmë që qeveria shqiptare por edhe Parlamenti të miratojë një reformë gjithëpërfshirëse zgjedhore e cila të përfshijë të gjitha rekomandimet e shkuara e të tashme nga OSBE ODIHR. Rezultati dhe përgjegjësia bie mbi qeverinë që të ndërmarrë e të kryejë këtë reformë kaq të gjerë sepse me patjetër që i ka numrat. Nga ana tjetër është dhe pritshmëria e shqiptarëve duke qenë se Shqipëria është në këtë rrugëtim për t’u futur në BE.
Pyetje: Standardet e zgjedhjeve?
Gonzato: Në raport me atë çfarë patë, kemi një raport të OSBE ODIHR i cili pasqyron si kanë qenë këto zgjedhje ndërkohë që i ka njohur me standardet. Ndërkohë që përmenden dhe çështje si përdorimi i burimeve publike, por administrimi i zgjedhjeve është përgëzuar nga raporti i OSBE ODIHR ndaj po e theksoj që kjo është diçka e cila duhet trajtuar nëpërmjet një reforme gjithëpërfshirëse në të ardhmen. Dua të vlerësoj komisionin qendror të zgjedhjeve për punën që ata kanë bërë, prokurorinë e përgjithshme, SPAK, që do të thoja ka qenë një bashkëpunim ekzemplar.
Pyetje: Qëndrimet e opozitës për mosnjohjen e zgjedhjeve, a do të ndikojnë në rrugëtimin për në BE?
Gonzato: Do doja të thoja që çdo parti e cila mendon apo ndjen se ka patur parregullsi, patjetër le t’i raportojë ato e të ankohet te organet përkatëse që janë organet që administrojnë zgjedhjet dhe natyrisht edhe te organet përkatëse. Kjo është mënyra se si duhet të shkojnë gjërat. Megjithatë shpresoj që të dyja partitë kanë theksuar një sërë herësh dedikimin e tyre ndaj procesit të anëtarësimit dhe përpjekjeve të Shqipërisë për të shkuar drejt BE, do të punojnë realisht në këtë drejtim.
Prej dy ditësh, ambasadori i BE, Gonzato po viziton Korçën në kuadër të Javës së Evropës. Ai do të vizitojë disa nga zonat kryesore kulturore të qytetit dhe do të marrë pjesë në prezantimin e disa projekteve të financuara nga BE-ja.
