KORÇË- Kryeministri Edi Rama ka qenë sot i pranishëm në inagurimin e rrugës Qukës-Qafë Plloçë, e cila prej paradites së sotme do të jetë e kalueshme për të gjitha automjetet. Rama u prit me këngë e valle nga banorët e zonës, ndërsa nuk mungoi as kulaçi me kripë, si një gatim tradicional. Rama provoi i pari ushqimin, dhe pas tij zëvendëskryeministrja Belinda Balluku dhe deputeti i zonës Niko Peleshi.
Segmenti i ri, ka një gjatësi prej 43 kilometrash, përfshin rreth 10 kilometra përgjatë lumit Shkumbin dhe më pas kalon në zonën malore të Mokrës, duke përfshirë ndërtimin e mbi 20 urave, mure mbajtëse dhe një tunel 375 metra të gjatë. Ky aks i ri rrugor pritet që të shkurtojë distancën e Tiranës me Korçën, duke i dhënë një shtysë më shumë turizmit të Juglindjes./ZËRI
