TIRANË- Sipas një studimi të ri gati 64% e të anketuarve të Gjeneratës Z, grupmosha 18 deri në 28 vjeç, nuk dinë të gatuajnë. Sipas medias britanike “Daily Mail” pothuajse dy e treta e të rriturve të Gen Z pranojnë se u mungojnë aftësitë bazë të gatimit, ndërsa 61% e të anketuarve kanë pranuar se nuk dinë të gatuajnë një omëletë.
Në studimin e kryer të rinjtë e moshës 18 deri në 28 vjeç preferojnë të hanë jashtë ose të porosisin ushqime në shtëpi sepse nuk dinë të gatuajnë. Në sondazh morën pjesë 1500 pjesëmarrës në grupmosha të ndryshme dhe sipas rezultateve numri i të rinjve që janë të paaftë për të gatuar po rritet.
Pse GEN Z nuk gatuan
Më shumë se gjysma e të anketuarve e përshkroi aktin e gatimit si "stresues" dhe u shprehën se për të shmangur stresin ata kanë krijuar varësi për të ngrënë jashtë. Edhe vaktet e thjeshta dukej se ishin një “luftë” për shumë njerëz, me 42% që thanë se nuk mund të skuqnin as patate dhe 27% thanë se kishin vështirësi për të bërë supë.
Çuditërisht, edhe omëletat, të cilat në formën e tyre kanë vetëm një përbërës, ishin problem për 61% të të rriturve të Gen Z të anketuar.
Ushqimet më komplekse dukeshin krejtësisht të paarritshme për shumicën, me mbi 80% që thanë se nuk dinin nga të fillonin kur bëhej fjalë për gatimin e lazanjës ose pulës së pjekur. Një nga pjesëmarrësit e Gen Z, studentja 23-vjeçare Mia, tha: "Ndjehem sikur shumë prej nesh nuk janë rritur në kuzhina si brezat e vjetër."
"Plus, me aplikacionet e shpërndarjes së ushqimit dhe ushqimet e gatshme që mund t'i vendos në mikrovalë, është më e lehtë", tha ajo.
A gatuajnë brezat e tjerë?
Të rriturit e gjeneratës X, të cilët janë midis moshës 44 dhe 59 vjeç, ishin kuzhinierët më të sigurt me 85% që thanë se ndjehen rehat në kuzhinë dhe 72% thanë se i mësuan aftësitë nga prindërit e tyre.
Mijëvjeçarët, të moshave 29 deri në 43 vjeç, dolën më mirë se të rinjtë, me 68% që thanë se ndihen rehat duke gatuar në shtëpi.
Çfarë tjetër refuzon të bëjë GEN Z
Një studim tjetër zbuloi se të rriturit e Gen Z po refuzojnë të bëjnë detyrat themelore, duke zgjedhur në vend të kësaj të punësojnë një profesionist. Një studim i Halfords me 2000 të rritur zbuloi se 18 deri në 27-vjeçarët kishin më shumë gjasa të paguanin një profesionist për punët bazë rreth shtëpisë ose të rregullojnë makinë.
Një në pesë nuk e dinte se çfarë ishte çelësi dhe pothuajse një e katërta nuk mund të ndryshonte një llambë në tavan, duke thënë shpesh se ngjitja e një shkalle ishte "shumë e rrezikshme". Një në pesë të grupmoshës tha se do të thërriste një profesionist për të ndryshuar llambën në një dritë tavani.
Lënë punën për shkak të stresit
Gjenerata Z gjithashtu merr më shumë ditë pushimi nga puna për shkak të stresit se çdo grupmoshë tjetër. Një sondazh zbuloi se një e treta e punëtorëve të Gen Z morën pushim për shkak të stresit vitin e kaluar. Stresi i lartë midis punëtorëve të rinj ishte kryesisht për shkak të punës së rregullt jashtë orarit të papaguar dhe marrjes së orëve shtesë për të përballuar koston e rritur të jetesës. Megjithatë, në mesin e punëtorëve të moshës 45 vjeç e lart, vetëm një në 10 mori pushim vitin e kaluar për shkak të stresit. /ZËRI
