Ngritja e ekstremit të djathtë është një rrezik real për të gjithë Evropën dhe implikimet nuk lidhen vetëm me realitetin e ri politik që po merr formë në Kontinentin e Vjetër. Në dokumentarin me titull "Uniteti, drejtësia dhe diversiteti, Kombëtarja midis racizmit dhe identifikimit", që ka të bëjë me kombëtaren gjermane të futbollit, është kryer një sondazh nga instituti Sport-Inside që kishte të bënte me praninë e emigrantëve në kompleks përfaqësues.
Në të janë pyetur gjithsej 1304 persona mes datave 2-3 prill, me rastin e përbërjes së Kombëtares Gjermane në kuadër të Euro 2024 (14 qershor-14 korrik). 2/3 e të anketuarve rezultuan pozitivë në parapërzgjedhjen e Julian Nagelsmann (trajnerit federal) i cili në skuadrën prej 27 lojtarësh ka përfshirë Udav, Sane, Musiala, Guidogan, Henriques, Rudiger, Ta që kanë lindur ose janë rritur në Gjermani por vijnë nga familje emigrantësh.
Megjithatë, në të njëjtin sondazh, 21% e të anketuarve theksuan se do të dëshironin të shihnin më shumë lojtarë të bardhë në ekipin kombëtar. Shumica e atyre që mbështesin këtë pikëpamje vijnë nga radhët e AfD-së (partia e ekstremit të djathtë të Gjermanisë).
Një tjetër element mbresëlënës ka të bëjë me faktin se 17% e të anketuarve e kanë quajtur turp që kapiten i kombëtares është Ilkay Gudogan, djali i emigrantëve turq, ndërsa gjatë dokumentarit veteranë ndërkombëtarë Gerald Asamoah, Skodran Mustafi flasin për çfarë përjetuan kur ishin në veprim aktiv. Dokumentari ku do të shfaqen rezultatet e hulumtimit do të shfaqet më 5 qershor nga ARD, por tashmë ka reagime të forta, më kryesorja nga futbollisti ndërkombëtar Joshua Kimmich.
“Kjo çështje nuk ka qenë kurrë një problem brenda vetë ekipit. Kushdo që është rritur duke luajtur futboll e di se kjo është absolutisht e pakuptimtë. Futbolli bashkon njerëz të ngjyrës së lëkurës dhe feve të ndryshme dhe kjo është ajo që ka të bëjë. Do të më mungonin shumë lojtarë nëse nuk do të ishin këtu. Pra, kjo është absolutisht raciste”, tha asi i irrituar i Bayern-it, por ai u përlesh edhe me drejtuesit e transmetuesit për kohën që ata zgjodhën për të transmetuar çështjen specifike.
“Nëse mendon se kemi një kampionat evropian në shtëpi, është absurde të bësh një pyetje të tillë, kur synimi është bashkimi i të gjithë vendit dhe në teori duam të arrijmë gjëra të mëdha së bashku. Si skuadër, ne po mundohemi që të kemi të gjithë në Gjermani pas nesh. Një hetim i tillë nuk ka absolutisht asnjë kuptim”./ZËRI
