BEOGRAD- Komisionerja për Zgjerimin e Bashkimit Evropian, Marta Kos ka reaguar për protestat në Serbi, Kos përmes një deklarate tha se është duke i ndjekur zhvillimet e fundit dhe shqetësimet e qytetarëve në vendin ballkanik. Kos u shpreh se BE mbron të drejtën e qytetarëve për të protestuar dhe bqëri thirrje për dialog, në mënyrë që situata të normalizohet. Sakaq, Komisionerja bëri thirrje që të kryhen hetime transparente rreth tragjedisë në Novi Sad, ku mbetën të vrarë 15 persona.
“Kohët e fundit kam marrë disa letra nga anëtarë të akademisë serbe, përfaqësues politikë dhe organizata të shoqërisë civile që shprehin shqetësimet për situatën aktuale në Serbi. I kam ndjekur me vëmendje protestat në Serbi. Unë dua t'i përgjigjem shqetësimeve të shprehura dhe të kujtoj se çfarë përfaqëson Bashkimi Evropian.
Liria e tubimit është një e drejtë themelore
Vlerat themelore janë në thelb të projektit tonë të përbashkët evropian dhe duhet të respektohen. Liria e tubimit është një e drejtë themelore që duhet respektuar. Duhet të ushtrohet në mënyrë paqësore dhe në përputhje me ligjin. Incidente kundër demonstruesve janë parë. Ne presim një hetim të plotë, të paanshëm dhe të shpejtë. Asnjë dhunë nuk duhet toleruar. Presim që policia serbe të vazhdojë të sigurojë sigurinë e demonstruesve. Gjuha që nxit dhunën dhe mungesa e respektit të ndërsjellë nuk mund të jetë zgjidhja.
Axhenda evropiane forcon sundimin e ligjit
Mbetet prioriteti i BE-së dhe Presidentit të Komisionit von der Leyen për të mbështetur Serbinë në avancimin në rrugën e saj evropiane dhe për t'u bërë pjesë e Bashkimit Evropian. Rruga drejt anëtarësimit në BE përfshin reforma të cilat ruajnë vlerat tona të përbashkëta në legjislacion dhe praktikë. Rruga e Serbisë drejt Bashkimit Evropian ofron zgjidhje për shumë nga çështjet që janë në qendër të diskutimit sot.
Reformat që janë pjesë e procesit të anëtarësimit në BE do të forcojnë luftën kundër korrupsionit, do të sigurojnë pavarësinë e gjyqësorit dhe llogaridhënien e institucioneve, do të promovojnë lirinë dhe pluralizmin e medias dhe do të përmirësojnë kushtet zgjedhore. Nëse zbatohen siç duhet, këto reforma do të kenë një efekt transformues që do të përfitojnë të gjithë qytetarët dhe do ta afrojnë Serbinë me Bashkimin Evropian.
Pranimi në BE është një projekt i të gjithë shoqërisë
Procesi i anëtarësimit në BE kërkon një përpjekje intensive nga e gjithë shoqëria. Ai duhet të jetë një projekt kombëtar në pronësi të të gjithëve: qeverisë, parlamentit, opozitës, shoqërisë civile, çdo qarku, qyteti dhe fshati, dhe në fund të fundit çdo qytetar në vend. Është e rëndësishme që të krijohen kushtet për një dialog gjithëpërfshirës që përfshin të gjithë aktorët, aktorët politikë, institucionet dhe anëtarët e shoqërisë civile për të adresuar reformat që janë të nevojshme për të ardhmen evropiane të Serbisë. Kjo do të forcojë shoqërinë serbe dhe do të konsolidojë rrugën e Serbisë drejt anëtarësimit në BE”, tha Kos.
Para tre muajsh në qytetin e Novi Sad tavani i një stacioni hekurudhor u shemb, ku si pasojë humbën jetën 15 persona. Pas kësaj tragjedie, për tre muaj protestat nuk kanë ndalur në Beograd, pasi qytetarët akuzojnë qeverinë se qëndron pas kësaj, për shkak të korrupsionit që ka “pushtuar” vendin. Studentët në Serbi vazhdojnë me protestast e tyre dhe me bllokimin e rrugëve kryesore. Deri tani nga protestat është tërhequr kryeministri Milosh Vuçeviç, por as kjo lëvizje nuk i ka kënaqur protestuesit. Universitetet e vendit janë bllokuar, deri sa të pranohen kërkesat e tyre./ZËRI
