Follow the money 2/ Si e bleu Artan Gaçi hotelin nga Ekrem Bardha?

Artan Gaçi dhe Ekrem Bardha

TIRANË- Në kohën që Kuvendi është duke pritur të shqyrtojë në Këshillin e Mandateve, mandatin e Olta Xhaçkës, SPAK është duke hetuar dhe verifikuar investimin e bashkëshortit të saj, investitorit strategjik, Artan Gaçi në Gjilekë. ZËRI publikoi dhe ndërtimin e Mellesin, një hotel që siç thamë nuk është aspak i zakonshëm. I fshehur kudo nga rrjetet sociale, ky hotel-distileri ka qenë objekt hotelerie edhe më herët, kur ishte në pronësinë e biznesmenit Ekrem Bardha, i cili më pas ia ka kaluar këtë pronë Artan Gaçit.

Se me ç’vlerë është blerë kjo pronë nga Gaçi, kjo është një e dhënë e panjohur, edhe pse ne i kemi kontaktuar disa herë palët e përmendura në këtë shkrim. Por nëse duket se aktiviteti politik i Olta Xhaçkës është i distancuar nga ai i biznesit të bashkëshortit, në fakt e vërteta është ndryshe.

Leonard Konica, administratori i Melesin është edhe administrator i njësisë administrative Leskovik. Siç shihet edhe në këtë kronikë reklamë të RTSH, Administratori i Leskovikut, njëherazi edhe administrator i Gaçit, flet për përfitimet e turizmit në zonë. Edhe kronikat dhe intervistat janë realizuar në Melesin. Pra një reklamë e mirëfilltë. Por kaq nuk mjafton!

Edhe kryetari i Bashkisë Kolonjë, Erion Isai zhvillon aktivitete të shumta në këtë hotel. E gjithë bashkia është e investuar për të bërë që biznesi i GaçIt të funksionojë. Vetë Isai, i kontaktuar nga ZËRI, deklaron se zoti Konica nuk është në konflikt interesi.

"Zoti Leonard Konica është emëruar adiministrator i njësisë Leskovik prej datës 11.01.2022. Në dIjeninë time dhe institucionale; nuk kam asnjë informacion se zoti Konica cënon ligjin e konfliktit të interesit."-deklaroi Isai në një komunikim via Whatsapp me redaksinë e ZËRI-t.

Por kush e emëroi Konicën në bashki? A lidhen interesat e tij që burojnë nga aktiviteti privatisht me z.Gaçi me punën e tij si administrator e zyrtar shtetëror? Për këtë mjafton të shohim ligjin për konfliktin e interesit. Neni 29 i ligjit, për kufizimet e kryetarit të bashkisë apo komunës (rasti Konica), sqaron se nuk mund të jetë pjesë e një shoqërie tregtari apo të jetë i punësuar me kohë të plotë në një punë a detyrë tjetër.

Ndërkohë që burime për ZËRI-n, sqarojnë se vetëm investimi në distilerinë për prodhimin e xhinit kap vlerën e 500 mijë eurove. Një vlerë marramendëse kjo, nëse përmendim që hoteli në fjalë në deklarimet zyrtare del me zero fitim, aktualisht.
Kaq do të mjaftonte për të kuptuar se çifti Gaçi-Xhaçka janë të interesuar që Melesin të mos jetë target i reklamës mediatike për ta.

Kjo provohet nga një tjetër fakt. Më 28 shkurt 2024, disa ditë përpara se SPAK të arrestonte Jorgo Goron për falsifikimin e pronës mbi të cilën Gaçi do të ndërtojë resortin, bashkëshorti i Xhaçkës përmes zotërueses së tij të besuar Brunilda Tasi, bën ndryshimin e emrit të Melesin. Nga Melesin, hoteli quhet tashmë MDIJ. Përse kjo lëvizje? Por edhe pse fijet po lidhen, sërish nuk kemi të qartë një pyetje. Si u pasuruan çifti Olta Xhaçka dhe Artan Gaçi?

Në përputhje me standarded JTI