SHKUP- Studentët shqiptarë po protestojnë sot në sheshin kryesor të Shkupit në mbrojtje të gjuhës shqipe. Qindra studentë mbajnë në duar pankarta me mesazhe të forta.
“Mos e mohoni një të drejtë të fituar”, “Ligji për gjuhët është lex specialis!”, “Gjuha shqipe nuk negociohet”- këto janë disa nga mesazhet kryesore të studentëve.
Studentët shqiptarë kërkojnë që provimi i Jurisprudencës të zhvillohet në gjuhën shqipe. Përveç barazisë, ata kërkojnë edhe dorëheqjen e ministrit të Drejtësisë, Fillkov.
Protesta e sotme është një nga reagimet më të forta të kohëve të fundit në Maqedoninë e Veriut. Organizatorët kanë bërë thirrje për një protestë paqësore dhe për përmbushjen e kërkesës së tyre kryesore: zhvillimin e provimeve në gjuhën shqipe.
Debati për Ligjin e Gjuhëve në Kuvendin e Maqedonisë së Veriut filloi në shtator të vitit 2017, por miratimi i këtij ligji ngeci për shkak të Partisë VMRO. Në vitin 2018, ligji i miratuar për dygjuhësinë vendosi që gjuha shqipe të jetë zyrtare jo vetëm në komunat me të paktën 20% të popullsisë shqiptare, por edhe në nivel kombëtar.
Pas peticionit të mbi 380 studentëve, qëndrimet zyrtare kanë pësuar luhatje, nga pranimi fillestar i së drejtës, deri te arsyetimi se nevojiten ndryshime ligjore. Ndërkohë, autoritetet kanë paralajmëruar formimin e një grupi pune, edhe pse ekspertët juridikë theksojnë se baza ligjore për përdorimin e shqipes tashmë ekziston./ZËRI
