TIRANË- Një 23-vjeçar ka rënë në prangat e policisë pasi u kap me armë zjarri me vete. Siç bëhet me dije nga blutë, 23-vjeçari Pjetër Gjini, lëvizte me taksi për të mos rënë në sy, por policia pasi mori informacione ra në gjurmët e tij dhe e arrestoi në flagrancë. Gjatë operacionit policia ndaloi edhe kushëririn e tij, Xh. Gj., 24 vjeç, i cili u procedua penalisht në gjendje të lirë për moskallëzim krimi.
Njoftimi i policisë:
Tiranë/Finalizohet operacioni policor i koduar “Destinacioni”.
Lëvizte me taksi, për të shmangur kontrollet e Policisë, pasi kishte me vete armë zjarri, arrestohet 23-vjeçari, banues në Lezhë.
Sekuestrohet arma e zjarrit me municion.
Procedohet penalisht kushëriri i 23-vjeçarit, i cili e shoqëronte në mjet.
Si rezultat i administrimit të menjëhershëm të informacioneve të siguruara në rrugë operative, se një shtetas që levizte me taksi, posedonte 1 armë zjarri, shërbimet e Komisariatit të Policisë Nr. 4 finalizuan operacionin “Destinacioni”.
Gjatë operacionit, u ndalua në Rrugën e Dibrës, taksia me të cilën lëviznin shtetasi P. Gj., 23 vjeç dhe kushëriri i tij, shtetasi Xh. Gj., 24 vjeç, të dy banues në Lezhë. Nga kontrollet, në çantën e 23-vjeçarit, u gjet 1 armë zjarri pistoletë me municion.
Në përfundim të veprimeve procedurale në lidhje me këtë rast, shtetasi P. Gj. u arrestua për veprën penale “Mbajtja pa leje dhe prodhimi i armëve, armëve shpërthyese dhe i municionit”, ndërsa 24-vjeçari u procedua në gjendje të lirë, për veprën penale “Moskallëzimi i krimit”.
Materialet procedurale iu referuan Prokurorisë së Tiranës, për veprime të mëtejshme.
