DURRËS- Një 14-vjeçare është larguar nga shtëpia në orët e para të mëngjesit të sotëm. Kanë qenë prindërit e saj që kanë ngritur shqetësimin lidhur me largimin e të miturës nga shtëpia.
Nëna e vajzës, B. Tusku, ka deklaruar se deri në orën 5 të mëngjesit, kur ka qenë zgjuar për konsumimin e syfyrit, vajza ka qenë në shtëpi, por më pas në orën 6:30, vajza nuk ishte më në dhomën e saj.
Nëna tha se ka gjetur një letër ku e mitura shkruante: Po largohem, mos më kërkoni.
Menjëherë pas kësaj, prindërit kanë nisur kërkimet për të miturën. Bëhet me dije se ajo është nxënëse në shkollën “Qemal Mici” në Durrës, ndërsa sot nuk ka shkuar në mësim. Sipas familjarëve, vajza kishte shprehur shqetësime ditët e fundit, duke thënë se po ndihej e kërcënuar nga disa persona pas orarit të mësimit, por askush nuk kishte marrë seriozisht këto kërcënime.
Lidhur me zhdukjen e vajzës së mitur është bërë denoncimi në polici, ndërkohë që prindërit apelojnë që kushdo që ka dijeni ose e ka parë 14-vjeçaren të kontaktojë në numrat: 0693367135 / 0695523151. /ZËRI
