TIRANË- Qendra Spitalore Universitare “Nënë Tereza” ka reaguar për rastin e foshnjes 9-ditëshe që humbi jetën në spital. Lidhur me ngjarjen e ndodhur pak ditë më parë, QSUT bën me dije se foshnja, B.D., humbi jetën si pasojë e komplikacioneve që shoqërojnë anomali të rënda të sëmundjes në zemër. Po ashtu, shtojnë se familjarët e foshnjes së ndjerë janë informuar përpara ndërhyrjes për komplikacionet e mundshme post-operatore.
"Ndjejmë të nevojshme të theksojmë se asnjë pjesëtar i stafit të Qendrës Spitalore Universitare “Nënë Tereza” nuk është kontaktuar për të dhënë shpjegime për rastin në fjalë, në mënyrë që rasti të pasqyrohej i balancuar në opinionin publik,"-thuhet ndër të tjera në njoftim.
Vdekja e foshnjës ndodhi pak ditë më parë, të premtën. Babai i foshnjës ka deklaruar se djali kishte nevojë për ndërhyrje të menjëhershme kirurgjikale pasi kishte transpozicion të enëve të gjakut. Po i ati i fëmijës denoncoi se strukturat spitalore se kishin një sallë të lirë për operim dhe shtoi se ilaçi me të cilin duhet të trajtohej foshnja, mungonte.
SQARIM I EKIPIT TË SHËRBIMIT TË KARDIOKIRURGJISË
Nisur nga disa publikime në disa media online për rastin e fëmijës B.D që fatkeqësisht humbi jetën si pasojë e komplikacioneve që shoqërojnë anomali të rënda të sëmundjeve të zemrës tek një i porsalindur, shërbimi i Kardiokirurgjisë së QSUT, sqaron se: Qendra Spitalore Universitare “Nënë Tereza” çdo ditë mban mbi supe misionin jetëshpëtues për dhjetëra mijëra qytetarë që vijnë nga gjithë Shqipëria, por edhe nga trevat përreth. Ndër vite janë trajtuar me shumë sukses mbi 1300 raste të pacientëve të vegjël. Edhe gjatë ndërhyrjes së kryer ndaj fëmijës B.D, edhe pas operacionit, përkujdesja e mjekëve ka qenë maksimale dhe i është dhënë shërbimi i nevojshëm, duke u ndjekur me shumë kujdes nga ekipi reanimator i QSUT-së.
Familjarët janë informuar edhe përpara ndërhyrjes për komplikacionet e mundshme post operatore, për gjendjen e patologjisë së lindur dhe atë të fëmijës përpara ndërhyrjes. Mjekët kanë marrë aprovimin e tyre për kryerjen e ndërhyrjes. Ndjejmë të nevojshme të theksojmë se asnjë pjesëtar i stafit të Qendrës Spitalore Universitare “Nënë Tereza” nuk është kontaktuar për të dhënë shpjegime për rastin në fjalë, në mënyrë që rasti të pasqyrohej i balancuar në opinionin publik.
Ndaj, duke marrë parasysh pasaktësitë në publikimet mediatike, theksojmë se puna e këtij shërbimi kombëtar jetëshpëtues, minimumi duhet të trajtohet i verifikuar dhe duke marrë parasysh të gjitha detajet e rastit në fjalë.
QSUT është dhe do të mbetet adresa e përditshme e problematikave të tyre shëndetësore dhe nuk i meriton në asnjë rast komentet keq informuese nga askush./Zëri.ai
