KANADA-Agjencia Kanadeze e Inspektimit të Ushqimit (CFIA) ka njoftuar tërheqjen e qumështit pluhur formulë për foshnja 'Kendamil' për shkak të shqetësimeve në lidhje me një toksinë të lidhur me helmimin nga ushqimi. Mediat e huaja raportojnë se kjo tërheqje është kryesisht për shkak të pranisë së mundshme të toksinës cereulide, e cila mund të çojë në simptoma të tilla si të përziera dhe të vjella dhe është dukshëm rezistente ndaj nxehtësisë, duke e bërë të vështirë eliminimin e saj përmes metodave tipike të gatimit.
Pavarësisht tërheqjes së produktit, agjencia vuri në dukje se nuk ka pasur raste të raportuara të sëmundjeve të lidhura me këtë formulë të veçantë. Kendal Nutricare, prodhuesi i formulës Kendamil, shpjegoi se është gjetur se cereulidi është i lidhur me vajin e acidit arakidonik, një burim i Omega-6. Gjatë një problemi të përkohshëm të furnizimit, Kendal Nutricare përdori një burim alternativ vaji për dy seri të formulës për foshnje që u shpërndanë në Kanada.
Kjo tërheqje vjen pas veprimeve të ngjashme nga kompani të mëdha si Nestlé dhe Danone, të cilat së fundmi u përballën me tërheqje të produkteve të tyre të formulës për foshnje për të njëjtën toksinë.
Qumështet formulë zënë një vend të gjerë edhe në Shqipëri, ku vetëm pak kohë më parë u tërhoqën nga tregu “NAN 1 OPTIPRO”, pasi u konstatua prania e bakterit cereulide, i cili shkakton probleme serioze gastrointestinale tek foshnjat dhe sot edhe me tërheqjen e “Aptamil AR2” dhe "Aptamil1". Rastet tregojnë se rreziku nuk është teorik, por real. ZËRI ishte media e parë në Shqipëri që denoncoi në dokumentarin “Qumështi i Ndaluar”, fenomenin e përhapur masivisht në Shqipëri të promovimit të qumështit formulë dhe shqetësimet e ngritura po reflektohen sot./ZËRI
