Një histori që duket si skenar filmi është zhvilluar së fundmi në Dubai, ku një diamant rozë me vlerë 25 milionë dollarë u vodh përmes një mashtrimi të sofistikuar, por u rikuperua nga autoritetet vetëm tetë orë më vonë.
Tre shtetas aziatikë, identiteti i të cilëve nuk është bërë publik, vepruan si “blerës të rremë” të një diamanti të ofruar nga një tregtar evropian. Ata fituan besimin e një tregtari të njohur të gurëve të çmuar përmes takimeve në hotele luksoze dhe u shfaqën të përgatitur për të kryer një blerje reale. Një ekspert u përfshi për të verifikuar origjinalitetin e gurit, duke i dhënë skemës një pamje të besueshme.
Kur u vendos që diamanti të dërgohej në një vilë për “finalizimin e marrëveshjes”, hajdutët e shfrytëzuan momentin për ta rrëmbyer gurin dhe u larguan menjëherë. Por policia e Dubait reagoi me shpejtësi dhe profesionalizëm: përmes një operacioni të shpejtë hetimor, autorët u identifikuan dhe diamanti u rikuperua përpara se ata të mund të largoheshin nga vendi.
Dubai, një ndër qendrat më të mbikëqyrura në botë, është i pajisur me një rrjet të gjerë kamerash sigurie në çdo hapësirë publike – nga aeroportet te hotelet, taksitë dhe qendrat tregtare. Pikërisht kjo infrastrukturë ka ndihmuar më parë në raste të tjera të profilit të lartë, përfshirë vrasjen e një zyrtari të Hamasit nga agjentë të Mossadit në 2010, grabitjen nga banda famëkeqe “Panterat Rozë” në vitin 2007, si dhe vrasje të bujshme me autorë të huaj.
Autoritetet nuk dhanë shumë detaje për mënyrën e kapjes, por pranuan se autorët ishin shpërndarë në vende të ndryshme pas vjedhjes dhe se ishin ndjekur nga një “sy i padukshëm”, që mund të jetë teknologjia e avancuar ose inteligjenca njerëzore./ZËRI
