GREQI- Ekzekutimi i një prej mafiozëve grekë, 44-vjeçarit Vangelis Zampounis ka zgjeruar hetimet për kapjen e pjesëtarëve të mafias greke. Së fundmi policia zbuloi dhjetëra llogari bankare të “kumbarëve” të njohur, të gjallë e të vdekur në një bankë të huaj që operon në Athinë.
Milionat nuk kanë fund dhe prona luksoze në emër të “kumbarëve” u gjetën në rrugët më të shtrenjta të Athinës, pasi ata që merren me kontrabandën e karburanteve dhe cigareve kanë “pastruar” një pjesë të fitimeve të tyre të mëdha ndër vite, qoftë nëpërmjet depozitave bankare, qoftë nëpërmjet tregut të pasurive të paluajtshme. Në fakt, siç është bërë tashmë e qartë, menaxhimi i fitimeve të paligjshme është në disa raste një çështje familjare, ku familjarët e “kumbarëve” të vrarë vitet e fundit nga bandat rivale kanë hapur kafene, lavazhe, klube dhe restorante pa justifikuar në shumicën e rasteve origjinën e shumave për investimin, shkruan Protothema.
Autoritetet e krimit financiar kanë vënë në shënjestër edhe pikat e karburantit si pronësi, ku sipas vlerësimeve të zakonshme, rreth 500 nga 5500 pikat e karburantit që funksionojnë në Greqi kontrollohen drejtpërdrejt ose tërthorazi nga mafia greke. Sa i përket sasisë së fitimeve të kontrabandistëve, vlerësimet flasin edhe për 1.5 miliardë euro në vit, si nga karburantet, ashtu edhe nga cigaret.
Siç dihet, një pronar i madh karburanti ishte viktima e fundit në luftën e mafias greke, 44-vjeçari Vangelis Zampounis, i cili konsiderohej vitet e fundit si drejtuesi më i fuqishëm i saj, me aktivitet, përtej kontrabandës së karburanteve, në mbrojtjen e klubeve të natës, por edhe me infiltrimin e kontrabandës së cigareve, e cila dominohet nga mafia ruse, e cila vlerësohet se qëndron pas vrasjeve të Skaftouros dhe Rubetis , gjithashtu emra të botës së krimit.
Hetimi për identifikimin e vrasësve të Zampounis kalon përmes analizës financiare të pasurisë së tij, si dhe pronës së kundërshtarëve të tij në fushën e krimit të organizuar.
“Spastrimi i madh” për dominimin e krimit të organizuar ka shkaktuar më shumë se 20 vdekje deri më sot dhe lufta kundër mafies është në vazhdim. Vrasje të dukshme ishin ato të Skaftouros, në maj 2022 dhe Rubetis, në qershor 2023, për të cilat janë arrestuar emigrantë nga vendet e ish-Bashkimit Sovjetik. Tashmë policia po përpiqet të gjejë lidhjen mes ekzekutimeve të Zampounis dhe Roubetis, të cilët ishin rivalë në zonën e natës.
Është interesant fakti se shumica e “kumbarëve” qëndruan për një kohë shumë të shkurtër ose aspak në burg, edhe pse akuzoheshin për krime të ndryshme. Gjithsesi hetimet vijojnë./ZËRI
