TIRANË- Kreu i grupit parlamentar i Partisë Demokratike, Gazment Bardhi ka paralajmëruar se Kuvendi i Shqipërisë nuk do të ketë më normalitet për sa kohë nuk pranohen kërkesat e opozitës. Gjatë fjalës së tij në një prononcim për gazetarët, një herë kërkesat e opozitës ndaj mazhorancës. Më pas ai ka thënë se ajo që po ndodh në Kuvend është vetëm fillimi. Ndërsa shtoi se për gjithçka që po ndodh, ka informuar edhe ambasadorët e vendeve të huaja në Shqipëri. Por nuk ka dhënë më tepër detaje se çfarë ka komunikuar me ta, e se çfarë mesazhi i kanë përcjellë.
KOMUNIKIMI PËR MEDIAT:
Dua të përsëris edhe një herë kërkesat minimale. Së pari të respektohet e drejta kushtetuese e deputetëve të opozitës për llogaridhënien e qeverisë. Së dyti, ka të bëjë me përmbushjen e një detyrimi nga disa raporte të OSBE/ODIHR për reformën zgjedhore. Opozita e ka shpallur prioritet. Ne kemi bërë propozime konkrete për anëtarët e komisionit dhe mazhoranca duhet të respektojë vendimin tonë. Së treti, ka të bëjë me një tallje të vazhdueshme që kryetarja e Parlamentit me urdhër të Edi Ramës bën me kryetarin e grupit parlamentar të Partisë Demokratike. Është kthyer në një manekin në shërbim të Edi Ramës. Kanë sjellë sot 100 forca të Gardës së Republikës, mund të sjellin 300 herën tjetër. Nëse ky është Parlamenti i një vendi anëtar të NATO-s që mbushet me punonjës të Gardës.
Për atë çfarë po ndodh kam informuar edhe ambasadorët e vendeve të huaja në Shqipëri. Me një pjesë prej tyre kam pasur edhe kontakt gjatë këtyre ditëve. Do të zhvillojmë edhe një mbledhje se çfarë do të bëjmë nesër. Nuk po kërkojmë që t'i zëmë karriget kolegëve të maxhorancës, po kërkojmë të drejtat tona. Ka ardhur momenti që maxhoranca të reflektojë, të mos vazhdojë akte që tregojnë arrogancën e tyre. E sigurtë është që as seanca e nesërme nuk ka për të funksionuar për sa kohë nuk funksionon opozita e vendit. Ne nuk kemi ardhur në kuvend me votat e krimit të organizuar.
Sa i përket përplasjes fizike në kuvend ne e kemi denoncuar në SPAK Vullnet Sinën për goditje për shkak të detyrës dhe ditët e tjera do të ketë denoncime të tjera.
