MEKSIKA-Shakira dhe Burna Boy kanë publikuar videoklipin e këngës Dai Dai, himni zyrtar i 2026 FIFA World Cup, duke sjellë një produksion spektakolar me pjesëmarrjen e yjeve më të mëdhenj të futbollit botëror.
Klipi paraqet emra të mëdhenj të futbollit botëror, përfshirë Lionel Messin, Harry Kane, Kylian Mbappe, Rodri, Vinicius Junior, Takefusa Kubo, Santiago Jimenez, Erling Haaland, Luis Diaz, Alphonso Davies, Jamal Musiala dhe Christian Pulisic.
“Dai Dai” vjen nga një shprehje që do të thotë “le të shkojmë, le të shkojmë”, që përsëritet si një shtytje e vazhdueshme përpara, pothuajse sikur nuk ka vend për t’u ndalur. Videoja paraqet gjithashtu pjesëmarrjen e Ghetto Kids Uganda, një organizatë joqeveritare që mbështet fëmijët jetimë dhe të cenueshëm përmes muzikës, vallëzimit dhe teatrit, duke u ofruar atyre arsim, strehim dhe kujdes mjekësor.
Superylli kolumbian ka qenë e lidhur me FIFA-n prej gati dy dekadash, duke nisur nga ceremonia e mbylljes së Kupës së Botës 2006 në Gjermani, ku interpretoi “Hips Don’t Lie” dhe “Bamboo”. Më pas ajo hapi dhe mbylli Kupën e Botës 2010 në Afrikën e Jugut me “Waka Waka (This Time for Africa)” dhe u rikthye sërish në skenë në turneun e vitit 2014 në Brazil.
