MBRETËRI E BASHKUAR- Shqetësimet për shëndetin mendor të Leonard Farrukut u injoruan, shkruan The Guardian, ndërsa familja bën thirrje për hetim. Azilkërkuesi shqiptar, 27 vjeç, u gjet i vdekur në një maune, ankoruar në Portland, Dorset, më 12 dhjetor të vitit të kaluar. Dihet pak për rrethanat që çuan në vetëvrasjen e Farrukut, por një punonjës i ka thënë The Guardian se ai vazhdimisht ka ngritur shqetësime me kontraktorët e Home Office për shëndetin e tij mendor përpara se të vendosej në maune, por u shpërfill. Punonjësi pohoi se Farruku ishte i tmerruar se mos e çonin në maune dhe refuzoi të shkonte atje, por ishte mashtruar duke u hipur në makinë nga kontraktorët të cilët i thanë se do ta çonin në një hotel në Swindon.
Ai tha se burrat që shkuan në maune me Farrukun raportuan se ai sillej në mënyrë të çuditshme pasi ishte në bord dhe tha se ai kaloi orë të tëra në mënyrë pasive duke qëndruar në plazh në Weymouth dhe duke parë detin. Motra e Farrukut, Jola Dushku, 33 vjeçe, e cila jeton në Lombardi, Itali, tha se vëllai i saj ishte “i ëmbël dhe i bukur” dhe ëndërronte të bëhej reper kur jetonte në Shqipëri. Ajo tha se familja ishte ende në gjendje shoku për vdekjen e tij. Jola tha se qeveria e Mbretërisë së Bashkuar nuk e kishte njoftuar zyrtarisht atë apo motrën e saj më të madhe, Marsida, për vdekjen e Farrukut dhe se kushërinjtë në MB ishin informuar në vend të saj dhe kishin transmetuar lajmin. Hetimet vijojnë ende.
