MILOT- Një aksident i rëndë me pasojë vdekjen është regjistruar mesditën e sotme në Rrugën e Kombit, në segmentin Milot-Rrëshen, në afërsi të Rubikut. Nga informacionet paraprake mësohet se janë përplasur 2 automjete. Një automjet me drejtues shtetasin Nikoll Prenga 61-vjeç, është përplasur me një tjetër makinë që drejtohej nga shtetasi D. P., 30-vjeç.
Si pasojë e përplasjes fatale, kanë humbur jetën 2 persona, shoferi Nikoll Prenga dhe Franush Palaj, babai i shoferit tjetër. Ndërkohë, shoferi tjetër dhe 5 pasagjerë, kanë mbetur të plagosur janë dërguar për mjekim te Spitali i Traumës për të marrë ndihmën mjekësore.
Shërbimet e policisë kanë mbërritur në vendngjarje dhe po punojnë për zbardhjen e plotë të shkaqeve të aksidentit.
Njoftimi:
Rrëshen/Informacion paraprak
Në Rrugën e Kombit, në segmentin Rrëshen–Milot, automjeti me drejtues shtetasin N. P., 61 vjeç, është përplasur me automjetin me drejtues shtetasin D. P., 30 vjeç.
Si pasojë e aksidentit kanë ndërruar jetë drejtuesi i njërit prej automjeteve shtetasi N. P., si dhe shtetasi F. P., rreth 57 vjeç (babai i shtetasit D. P.)
Gjithashtu, janë dëmtuar drejtuesi i automjetit tjetër, shtetasi D. P., si dhe 4 pasagjerë, të cilët janë transportuar në Spitalin e Traumës, në Tiranë, për ndihmë mjekësore.
Grupi hetimor, nën drejtimin e Prokurorisë, vijon punën për përcaktimin e shkakut të aksidentit dhe dokumentimin ligjor të rastit./ZËRI
