TIRANË- Prokuroria e Tiranës përmes një njoftimi për mediat, konfirmon nisjen e hetimeve për kolegjin universitar Wisdom, administratorët e të cilit u vunë në pranga nga autoritetet italiane, pasi dyshohet se janë pjesë e një skandali për falsifikimin dhe shitjen e diplomave.
Prokuroria e Italisë ka dalë në përfundimin se të 9 të arrestuarit, të cilët i cilëson si grup kriminal, jepnin certifikata dhe diploma false, kundrejt një pagese prej 8 mijë eurosh.
NJOFTIMI I PROKURORISË
Prokuroria pranë Gjykatës së Shkallës së Parë të Juridiksionit të Përgjithshëm Tiranë mbi bazën e kallëzimit të shtetasit S.C në cilësinë e administratorit të shoqërisë “Wisdom” shpk ka regjistruar procedimin penal nr. 4148 të vitit 2024 për veprën penale “Falsifikimi i dokumenteve shkollore” parashikuar nga neni 187/2 të Kodit Penal. Çështja është në fazen e hetimeve dhe informacion më i detajuar në lidhje me veprimet hetimore në këtë fazë nuk mund t’u vihet në dispozicion përshkak të sekretit hetimor.
Sipas raportimeve të bëra nga mediat, pjesa më e madhe e falsifikimeve është bërë pas 2021 kur pronarët kanë ndryshuar dhe universitetin e kanë marrë një grup italianësh. Po ashtu, ka siguruar edhe një dëshmi që i ka dhënë ish-rektori i Kolegjit, Lush Përpali. Ky i fundit ishte rektor në “Ëisdom” prej vitit 2017, por la detyrën në vitin 2023.
Sipas tij, ai ka zbuluar disa diploma të parregullta me firmën e tij të falsifikuar dhe pa vulën e kryesekretarit të Kolegjit. Ndaj edhe kishte vendosur që të linte postin që në janar të vitit 2024. Ish-rektori zbulon se edhe pasuesi i tij që emëruan drejtuesit e "Wisdom", Bajram Hysa, u largua nga detyra në qershor të këtij viti (2024), pasi edhe ai, zbuloi skandalin.
Pas kësaj ngjarjeje, dy ish-rektorët, Lush Përpali dhe Bajram Hysa, nisën betejën që çështja të hetohej nga drejtësia shqiptare. Madje bënë kallëzim në Policinë e Shtetit, duke e referuar çështjen edhe në Prokurorinë e Tiranës.
Por si merreshin diplomat dhe si u zbulua skandali?
Fillimisht ka pasur një marrëveshje fiktive e firmosur mes rektorit Lush Përpali, të cilën rektori pretendon se nuk e ka firmosur. Marrëveshja është nënshkruar me "Universo Docente s.r.l" në Itali. Një pjesë e këtyre diplomave duhej të noterizoheshin në Shqipëri, madje italianët kanë ardhur në ambasadën italiane këtu. Në ambasadë kanë kërkuar të noterizohen diplomat e tyre. Pas marrjes së kësaj kerkesë, ambasada italiane ka kërkuar informacion tek Ministria e Arsimit për të vërtetuar nëse dokumentet ishin autentike. Në këtë moment, rektori Hysa ka informuar MAS se nuk bëhej fjalë për një marrëveshje të rregullt, duke denoncuar falsifikimin e fimës së tij.
Çfarë ka ndodhur?
Një skandal ka përfshirë sistemin arsimor në Shqipëri e ka zanafillën në Kolegjin Universitar Wisdom! Gjithçka u sinjalizua nga mediat italiane që raportuan se dy administratorët e Wisdom në Tiranë, kanë ngritur një skemë mashtrimi, ku shpërndanin diploma false për studentët në Itali, kundrejt pagesave që varionin nga 6 mijë deri në 20 mijë euro, në varësi të degës së specializimit, që kërkohej nga ana e përfituesve. Aksesin e kanë marrë nga zyrtarja Shqiponja Telhaj, e cila ka qenë në krye të Agjensisë për Sigurimin e Cilësisë në Arsimin e Lartë, e njohur shkurtimisht si ASCAL dhe gjatë kohës që ka mbajtur këtë detyrë, i ka hapur rrugën akreditimit të këtij Kolegji Universitar në Shqipëri.
Në krye të skemës me diploma që ‘përmbytën’ tregun italian qëndronte çifti i i të sapomartuarve Savino Cianci dhe gruaja e tij Lucia Catalano, të cilët duke përfituar nga lidhjet që kishin në Shqipëri dhe në Itali, morën drejtimin e Universitetit me premtimin që do ta shndërronin në një qendër të mësimdhënies, për të gjithë studentët e ekselencës në Ballkan. Por përgjimet e Guardia Di Finanza, falë një komenti dhe dëshmive të të gjithë atyre që kishin blerë diploma false, një prej tyre dhe një mësuesi, zbuluan se në fakt ajo që po ndodhte në vendin tonë ishte një skemë mashtrimi dhe shitje diplomash./ZËRI
