Punonjësit e burgut të Peqinit përfshihen në fushatë zgjedhore?!
ELBASAN- Prokuroria e Elbasanit ka regjistruar një procedim penal për “shpërdorimi i autoritetit policor”, pas një denoncimi publik të bërë në rrjetet sociale nga sekretari i Përgjithshëm i Partisë Demokratike, Flamur Noka. Në denoncimin e tij, Noka pretendon se disa punonjës të Institucionit të Ekzekutimit të Vendimeve Penale (IEVP), burgu në Peqin, po bëjnë fushatë në mbështetje të një kandidati për deputet në zgjedhjet e 11 majit 2025. Por vetë Prokuroria e Elbasanit, nuk e ka bërë me dije emrin e kandidatit për të cilin është bërë kallëzimi.
Tashmë është ngritur një grup i posaçëm hetimor me një prokuror dhe tre oficerë të policisë gjyqësore për të kryer hetime më urgjente. Pritet që të merren në pyetje personat në dijeni, bashkë me mbledhjen e provave dhe këqyrjen e pamjeve filmike./ZËRI
DIASPORA/ PD kërkesë KQZ: A kanë mbërritur vota në Shqipëri në rrugë jozyrtare?
TIRANË- Partia Demokratike përmes një kërkese iu është drejtuar Komisionit Qendror të Zgjedhjeve ku ka kërkuar më shumë informacion në lidhje me procesin e ardhjes së votave të diasporës shqiptare.
Sipas kërkesës së publikuar nga “Top Channel”, PD ka kërkuar informacione nëse ka raste që janë dërguar votat e diasporës, jashtë rrugëve zyrtare dhe jo përmes kompanisë postare të kontratuar nga KQZ.
Ky nuk është rasti i parë i denoncuar në lidhje me procesin e shpërndarjes, ku më herët edhe vetë votuesit kanë njoftuar problematikat me të cilat po përballen. Kostoja e paguar nga buxheti i shtetit për shërbimin e postës është 9.2 milion eurpo, pra gati 10 mln euro. Të gjitha këto para janë marrë nga kompania "DHL" për të kryer shërbimin e nevojshëm për të gjithë qytetarët që këto zgjedhjet për herë të parë votojnë./ZËRI
Nis shpërndarja e materialeve zgjedhore
KORÇË- Ka nisur shpërndarja e materialeve zgjedhore. Si fillim kanë mbërritur në qarkun e Korçës, nën masa të rrepta sigurie, shoqëruar nga mjetet e ushtrisë dhe forcat e policisë. Materialet zgjedhore po shpërndahen në të gjitha KZAZ e qarkut të Korçës. Në këtë qark janë në total 7 KZAZ. Materiale do të ruhet nga policia që do të qëndrojë në gatishmëri të plotë në oraret e përcaktuara nga autoritetet deri në momentin e shpërndarjes në qendrat e votimit. Deri më tani nuk janë raportuar incidente.
Zgjedhjet/ Bardhi lajmëron SPAK: Kryepolici i Fierit na pengon të bëjmë fushatë
FIER- Drejtuesi politik i Partisë Demokratike për qarkun e Fierit, Gazment Bardhi, ka bërë një tjetër denoncim në rrjetet sociale. Në postimin e tij, Bardhi ka denoncuar drejtorin e Policisë në Fier, Skënder Hitaj se ka inskenuar ngjarje apo penguar Partinë Demokratike në fushatë. Lidhur me denoncimin e tij, demokrati bën me dije se ka informuar menjëherë në kohë reale prokurorët e posaçëm dhe institucionet ndërkombëtare të monitorimit të zgjedhjeve.
DENONCIMI I BARDHIT:
Skënder Hitaj, drejtori i Policisë së qarkut Fier, më ngatërron mua me Belindën, kandidatët e PD me Ceno-t dhe Klevis-t e Belindës dhe strukturat e PD me administratën e arrogantëve të sjell nga Tirana të Belindës. Mbi çdo urdhër të paligjshëm që ke dhënë sot (6 Maj) në mbledhjen informale me vartësit e tu, për të inskenuar ngjarje apo penguar PD në fushatë, janë informuar në kohë reale prokurorët e posaçëm dhe institucionet ndërkombëtare të monitorimit të zgjedhjeve. Ska drejtor apo polici politike që ndryshon fatin që qytetarët i kanë paracaktuar Belindës tënde dhe shefit të saj Edi Rama. Ti thjesht po përcakton fatin tënd! Udhë e mbarë dhe kujdes nesër andej nga Mallakastra!/ZËRI
Berisha për median greke: Rikthehem për të çliruar Shqipërinë nga Rama. E sulmoi Belerin për Grykën e Gjipesë
TIRANË- Ish-Presidenti i Shqipërisë dhe kreu aktual i Partisë Demokratike, Sali Berisha ka folur për marrëdhëniet greko-shqiptare dhe rikthimin e tij politik, pak para zgjedhjeve kombëtare në vendin e tij, të cilat do të mbahen më 11 maj. Në intervistën që jep për "LiFO", ai pohon se marrëveshja e Zonës Ekzekutive Ekonomike (EEZ) që qeveria e tij kishte negociuar me Greqinë ishte më e mira e mundshme dhe akuzon Edi Ramën se e ka bllokuar, duke vepruar kundër interesit kombëtar të Shqipërisë. Sali Berisha, 80 vjeç, me profesion kardiolog, shërbeu si President i Shqipërisë nga viti 1992 deri në vitin 1997 dhe ishte Presidenti i parë i zgjedhur në mënyrë demokratike pas rënies së regjimit të Enver Hoxhës. Nga viti 2005 deri në vitin 2013, pasi Partia Demokratike u rikthye në pushtet, ai ishte Kryeministër i Shqipërisë, ndërsa vitet e fundit ka qenë përsëri politikisht aktiv, pavarësisht aventurave që pati dhe ndalimit të hyrjes në SHBA katër vjet më parë, një fakt që ai ia atribuon veprimeve të kundërshtarit të tij politik, Edi Rama.
E takuam pak kohë më parë në Athinë, në kuadër të turit të tij zgjedhor në vendin tonë, i cili u zhvillua me tone shumë më të ulëta se tubimet e zhurmshme të Edi Ramës. Vetë Sali Berisha duket shumë më pajtues sot sesa ishte në të kaluarën dhe vetëm sa e rrit tempin vetëm kur flet për kundërshtarin e tij politik, kryeministrin shqiptar Edi Rama.
"Jam shumë i lumtur dhe shumë optimist që do të heqim qafe qeverinë e Edi Ramës, e cila nuk respekton asnjë ligj, asnjë rregull, asnjë kriter, asnjë standard."
"A mund të jenë më të mira marrëdhëniet greko-shqiptare, në interes të të dy popujve fqinjë?"- e pyesim ne atë. "Absolutisht", përgjigjet ai, "mund të ishin më mirë, nuk ka asnjë arsye pse të mos jenë më mirë dhe jam thellësisht i bindur për këtë. Problemet midis fqinjëve ekzistojnë gjithmonë, por gjatë presidencës sime arritëm një traktat miqësie dhe bashkëpunimi në vitin 1996 me Presidentin Costis Stefanopoulos, i cili dha përgjigje për pothuajse shumicën e problemeve që trashëguam".
Sali Berisha i referohet 21 marsit 1996, kur Presidenti i Republikës Helenike, Costis Stefanopulos, vizitoi Tiranën, i cili ishte Presidenti i parë grek që vizitoi kryeqytetin shqiptar, dhe të dy nënshkruan Paktin e Miqësisë, Bashkëpunimit, Fqinjësisë së Mirë dhe Sigurisë.
“Edi Rama ishte njeriu që, sipas bindjes sime të thellë, veproi kundër interesit kombëtar të Shqipërisë, duke bllokuar një marrëveshje që jam absolutisht i bindur se ishte më e mira që mund të kishte qenë, ishte një marrëveshje fitimtare për të dyja palët,”- thotë sot Sali Berisha.
"Të gjithë do të përfitonim nga kjo marrëveshje. Ia kisha dërguar avokatëve dhe ekspertëve më të mirë dhe të gjithë më kishin siguruar se ishte një marrëveshje fitimtare për të dyja palët. Edi Rama më pas, ndoshta nën presionin e Erdoganit, sepse kishte njëfarë interesi të qartë nga ana e tij, e dërgoi marrëveshjen në Gjykatën Kushtetuese dhe e hodhi poshtë. Pastaj, qeveria ime, së bashku me qeverinë greke, e cila pa që unë isha pro marrëveshjes, vendosi ta dërgonte çështjen në Gjykatën Ndërkombëtare të Drejtësisë. Kur unë u largova nga pushteti dhe erdhi Rama, ai tha "jo, do ta zgjidhim vetë". Pasi negocioi në shumë raunde për këtë, në një moment ai i tha Nikos Kotzias: “Oh, kërkojmë ndjesë, por nuk mund ta bëjmë këtë, sepse vendimi i Gjykatës Kushtetuese nuk e lejon.” Kotzias ishte tërbuar në Korçë në atë kohë me këtë sjellje të Ramës.”
Njohja e veprës së Anastasit
Diskutimi me kryetarin e Partisë Demokratike të Shqipërisë përqendrohet te ndarja e fundit nga jeta e Kryepeshkopit Anastas të Shqipërisë, në funeralin e të cilit ai mori pjesë dhe foli me fjalë shumë të ngrohta, edhe pse dikur e shihte atë si një kundërshtar. Kur Anastasi u dërgua në spital me shëndet në gjendje kritike, Sali Berisha i habiti të gjithë me një postim në rrjetet sociale, në të cilin ftoi të gjithë besimtarët shqiptarë të luten për shëndetin dhe shërimin e "këtij shërbëtori vetëmohues të Zotit, i cili me dashuri dhe përkushtim hyjnor bëri kaq shumë për ringjalljen e Kishës Ortodokse Autoqefale të Shqipërisë".
Ai përgjigjet se e pranoi sepse respektohej nga të gjithë ortodoksët shqiptarë: Kjo ishte për mua baza më e fortë për ta pranuar atë. Askush tjetër nuk i plotësonte kërkesat për të qenë udhëheqës i Kishës Ortodokse. Më vonë, sigurisht që e vlerësova shumë punën e tij të jashtëzakonshme në ringjalljen e vërtetë të Kishës Ortodokse Shqiptare. Ai bëri një punë të shkëlqyer në përgjithësi, me përfshirje personale dhe mjete të kufizuara, sepse Kisha nuk ka fonde dhe mundësi të pakufizuara. Por ai i dha Kishës Ortodokse një rol shumëdimensional në të gjitha fushat e tjera. Ai përgatiti një ekip me cilësi të lartë për Kishën Ortodokse Shqiptare. Ai erdhi në Shqipëri si një grek i madh dhe vdiq si një grek i madh dhe një shqiptar i madh. Ai e deshi Shqipërinë, kontribuoi, prandaj i bëj homazh. Ai u respektua shumë, mendoj, nga të gjithë njerëzit fetarë, jo vetëm ortodoksët, por të çdo feje."
Shënjestrimi i Belerit
Kur u pyet për pakicën greke në Himarë që po proteston për pasuritë e tyre të paluajtshme, ai përgjigjet: Problemi është Mafia. Gjithçka që ndodhi me Fredi Belerin është sepse ai nuk pranoi që Rama të merrte Grykën e Gjipes, një grykë midis Vunoit dhe Dhërmiut që është një nga grykat më të famshme në botë. Ajo që u zbulua ishte se, pa dokumente kadastrale dhe pa dokumente konfiskimi, nëna e Edi Ramës dhe kushërinjtë e saj kishin siguruar një truall toke prej 224 mijë metrash katrorë përmes vendimeve gjyqësore. Kur skandali shpërtheu nga një gazetar i guximshëm, Rama tha se ishte një truall toke i vendosur diku lart në mal, por trualli ishte pranë detit, menjëherë pranë Grykës së Gjipes, e cila është e bukur dhe ndodhet në plazh. Ndaj ai e shënjestroi atë sepse Beleri nuk do ta lejonte kurrë Edi Ramën të merrte këtë tokë që nuk i përket familjes së tij. Kjo është e vërteta. Është një operacion i pastër mafioz, dhe nuk ishte vetëm ai i Ramës, por edhe ministrat e tjerë atje, që po marrin, ndërtojnë dhe shkatërrojnë tokën e vendasve, dhe kjo është e vërteta e Shqipërisë.
"Lufta" me Edi Ramën dhe ndalimi i hyrjes në SHBA
Megjithatë, Sali Berisha është përgjithësisht kritik ndaj Edi Ramës dhe e quan qeverinë e tij një "narko-shtet" dhe një "narko-fuqi".
“Ka dokumente që tregojnë në mënyrën më të dokumentuar dhe bindëse se në Shqipëri ka operacione midis krimit të organizuar dhe shtetit.”
Intervistën e tij e mbylli duke thënë: Sot jam shumë i lumtur dhe shumë optimist se do ta heqim qafe këtë qeveri, e cila nuk respekton asnjë ligj, asnjë rregull, asnjë kriter, asnjë standard.
Politikani veteran shqiptar është ndoshta i pafavorshmi në këtë betejë zgjedhore, por ai dhe kolegët e tij janë optimistë dhe besojnë se shkaktojnë suprizën këto zgjedhje./ZËRI
Zgjedhjet 2025/ Nis shpërndarja e materialeve zgjedhore, KQZ "mbyll" dërgesat në 6 qarqe
TIRANË- Komisioni Qendror i Zgjedhjeve ka filluar shpërndarjen e materialeve zgjedhore edhe në vend. Fletët e votimit, kutitë e votimit, proces-verbalet, dhomat e fshehtësisë dhe të gjitha materialet e tjera janë shpërndarë plotësisht në 4 qarqe të vendit. Aktualisht, procesi ka përfunduar në Gjirokastër, Korçë, Berat, Dibër, Shkodër dhe në qarkun e Lezhës.
Në Korçë materialet janë shpërndarë në 422 qendra votimi, të cilat ndodhen në 7 KZAZ-të e qarkut, përfshirë dy në bashkinë Korçë dhe pesë të tjera të shpërndara në bashkitë e tjera të qarkut. Pas qarkut të Korçës, materialet zgjedhore janë shpërndarë edhe në qarkun e Beratit, dhe rrjedhimisht edhe në Bashkitë Kuçovë, Dimal, Poliçan dhe Skrapar.
Shpërndarja ka nisur pa problematika dhe po zhvillohet nën masa të rrepta sigurie, ku materialet janë të garantuara nga mjetet e ushtrisë dhe forcat e Policisë së Shtetit. Në të gjitha qendrat ku materialet janë shpërndarë, nga sot deri në ditën kur do të dërgohen për t'u numëruar, do të ruhen 24 orë nga efektivët e Policisë së Shtetit./ZËRI
Punonjësit e IEVP fushatë zgjedhore në burgun e Peqinit, Prokuroria e Elbasanit nis hetimet URGJENTE
ELBASAN- Prokuroria e Elbasanit ka regjistruar një procedim penal për “shpërdorimi i autoritetit policor”, pas një denoncimi publik të bërë në rrjetet sociale nga sekretari i Përgjithshëm i Partisë Demokratike, Flamur Noka. Në denoncimin e tij, Noka pretendonte se disa punonjës të Institucionit të Ekzekutimit të Vendimeve Penale (IEVP) në Peqin po bënin fushatë në mbështetje të një kandidati për deputet në zgjedhjet e 11 majit 2025. Por vetë Prokuroria e Elbasanit, nuk e ka bërë me dije emrin e kandidatit për të cilin është bërë kallëzimi. Por, ka ngritur një grup të posaçëm hetimor me një prokuror dhe tre oficerë të policisë gjyqësore për të kryer hetime më urgjente. Pritet që të merren në pyetje personat në dijeni, bashkë me mbledhjen e provave dhe këqyrjen e pamjeve filmike.
Denoncimi në rrjetet sociale nga një subjekt politik, Prokuroria Elbasanit regjistron procedim penal për ‘Shpërdorim i autoritetit policor’
Prokuroria pranë Gjykatës së Shkallës së Parë të Juridiksionit të Përgjithshëm Elbasan, regjistroi kryesisht procedimin penal nr. 457/2025, për veprën penale “Shpërdorimi i autoritetit policor”, parashikuar nga neni 332/a i Kodit Penal. Regjistrimi u krye pas marrjes dijeni nga burime të hapura në internet për një denoncim publik në rrjetet sociale nga përfaqësuesi i një subjekti politik, lidhur me përfshirjen e mundshme të disa punonjësve të IEVP Peqin në fushatë zgjedhore në mbështetje të një kandidati për deputet në zgjedhjet e 11 majit 2025 dhe bazuar në urdhrin nr. 25, datë 28.03.2025 të Drejtuesit të Prokurorisë pranë Gjykatës së Shkallës së Parë të Juridiksionit të Përgjithshëm Elbasan “Mbi organizimin e shërbimit të gatishmërisë së përforcuar për periudhën zgjedhore nga 01.04.2025 deri më dt. 31.05.2025”, duke vlerësuar rëndësinë e posaçme të zgjedhjeve të lira e demokratike, në kuadër të qasjes proaktive të prokurorisë për identifikimin e rasteve të kryerjes së veprave penale në fushën e zgjedhjeve.
Në funksion të kryerjes së një hetimi të plotë e të gjithanshëm, u ngrit një grup i posaçëm hetimor i përbërë nga prokurori i çështjes dhe tre oficerë të policisë gjyqësore pranë prokurorisë, nga të cilët po kryhen verifikimet dhe veprimet e para hetimore me karakter të ngutshëm, si pyetje të personave me dijeni për veprën penale, këqyrje pamjesh filmike, sekuestrime të provave materiale (aparate celulare, DVR) etj. Prokuroria pranë Gjykatës së Shkallës së Parë të Juridiksionit të Përgjithshëm Elbasan mbetet e angazhuar për hetimin efektiv të veprave penale në fushën e zgjedhjeve, duke ftuar çdo individ apo subjekt politik të përcjellë në kohën e duhur çdo informacion për fakte penale.
Çfarë denoncoi sot Flamur Noka?
Sekretari i Përgjithshëm i PD, Flamur Noka ka denoncuar me foto dhe emra disa prej punonjësve të policisë në burgun e Peqinit me pretendimin se po bëjnë fushatë për kandidatë të Partisë Socialiste. Po ashtu, ka bashkangjitur edhe fotot e personave që ka denoncuar.
"Ne lokalin e policit Çim Delia (numri 5 ne liste) keta punonjes policie me uniforme kane zhvilluar takim per tu perfshire ne fushate. Data e takimit 2 ose 3 maj, ora 10. Ndersa ne dt.19 prill ne Gjocaj te Peqinit jane perfshire punonjësit e policise se burgut Peqin. Nje prej tyre ka qene polici Shefit Dranga. Ne takim ka qene dhe ajo e Elbasanit,"-shprehet Noka në denoncimin e tij.
POSTIMI I PLOTË:
/ZËRI
Zef Mazi: Premtimi i Ramës për anëtarësim në BE 2030 është “iluzion”
TIRANË- Premtimi i Edi Ramës për ta futur Shqipërinë në Bashkimin Evropian deri në vitin 2030 është “iluzion”, i tha BIRN ish-kryenegociatori për anëtarësimin e vendit. Duke synuar një mandat të katërt radhazi të paprecedentë në qeveri në zgjedhjet parlamentare të 11 majit, kryeministri Rama ka zbuluar një program të titulluar “Shqipëria 2030”, duke u zotuar të përfundojë negociatat e anëtarësimit në BE deri në vitin 2027 dhe të sigurojë anëtarësimin deri në fund të dekadës.
Qeveria e Ramës ka reklamuar hapjen e 16 nga 35 kapitujve negociues që nga viti 2022, por ish-diplomati Zef Mazi, kryenegociatori i Shqipërisë me BE-në në vitet 2020-2022, tha se hapja e kapitujve “nuk është e njëjta gjë” me mbylljen e tyre. Shqipëria, deri më tani, nuk ka mbyllur asnjë.
“Mali i Zi kishte hapur 32 kapituj në vitin 2012. 13 vjet më vonë, në vitin 2025, Mali i Zi ka qenë në gjendje të mbyllë vetëm pesë kapituj, nëse nuk gabohem,”-tha Zef në një intervistë.
“Prandaj, nuk mund ta kuptoj se nga vjen entuziazmi retorik i mbylljes së negociatave në vitin 2027 ose i dhënies së pasaportave të BE-së. Sado që do të doja t’i shihja gjërat në një dritë tjetër, kjo më duket më shumë iluzion sesa realiste.”
“Jam shumë i kujdesshëm kur bëhet fjalë për këtë, veçanërisht duke qenë i vetëdijshëm për rrethanat dhe situatën brenda BE-së dhe skepticizmin e disa shteteve anëtare të BE-së në lidhje me Ballkanin Perëndimor në përgjithësi”, tha Mazi, i cili është 69 vjeç dhe tani ka dalë në pension.
Integrimi në BE s’është çështje partie
Shqipëria mban zgjedhjet parlamentare më 11 maj, të cilat mund t’i japin Ramës edhe katër vjet në pushtet, përveç 12 viteve që ka pasur që nga viti 2013. Gjatë kësaj kohe, Partia Socialiste e Ramës është goditur nga një sërë skandalesh krimi të organizuar dhe korrupsioni dhe është akuzuar për shkelje të lirive të medias, megjithatë ajo vazhdon të përballet me një opozitë në rrëmujë. Kritikët thonë se, me pak gjëra për t’u mburrur në frontin e brendshëm, Rama po premton pranim të shpejtë në BE në një përpjekje për të siguruar mbështetje para zgjedhjeve. Ai, madje, shfaqi një maket të një pasaporte të BE-së për Shqipërinë. Megjithatë, Mazi paralajmëroi se integrimi në BE duhet të shihet si një çështje kombëtare, jo si një futboll politik.
“Integrimi në BE nuk është çështje partie, por çështje vendi”, tha ai.
“Kur një vend bëhet shtet anëtar, në tabelën e emrit nuk shkruhet ‘Partia Socialiste’ ose ‘Partia Demokratike’, por emri i vendit. Pjesa tjetër është marrëdhënie publike dhe fushatë.”
“Ka shumë pompozitet politik kur hapet një Grup (kapitujsh). Edi Rama nuk ngurron ta përdorë atë”, tha Mazi. “Ai, madje, shkon personalisht në Bruksel për një ngjarje që nuk kërkon ceremoni, por është thjesht pjesë e një procesi normal. Reklamohet për PR dhe konsum politik të brendshëm dhe kapital më shumë sesa kuptohet se çfarë do të thotë në të vërtetë.”
Çdo reformë është e rëndësishme
Sfida më e madhe me të cilën përballet Shqipëria, tha ai, është krijimi i një “strukture plotësisht funksionale, të qëndrueshme dhe të fuqishme të dedikuar vetëm për integrimin në BE. Kjo strukturë duhet të përbëhet nga staf i përhershëm, jo-rrotacional, shumë i kualifikuar, profesional, diplomatik, politik dhe teknik, të gjitha nën një çati të veçantë në nivel ministror”.
“Integrimi në BE është dhe duhet të shihet si një paketë”, tha ai.
“Reformat nuk janë hierarkike në rëndësi; secila është e rëndësishme në vetvete. Sigurisht, disa artikulohen më shpesh, disa jo aq shumë.”
“Çdo gjë që ndodh në një vend kandidat ka ndikim në procesin e integrimit në BE: politika dhe partitë politike, parlamenti, reformat, lufta kundër korrupsionit, gjyqësori, drejtësia, siguria… biznesi, media, qeverisja lokale, akademia, bujqësia, industria, doganat, monopolet e kështu me radhë.”
Dhe pastaj është çështja e lodhjes nga zgjerimi brenda vetë BE-së.
Pavarësisht retorikës nga Brukseli në favor të zgjerimit të mëtejshëm në Ballkan, disa anëtarë mbeten skeptikë, tha Mazi: Fatkeqësisht, nuk ka zëra mjaftueshëm të fortë dhe numerikë mbështetës për të nxitur integrimin e Shqipërisë, si dhe të Ballkanit Perëndimor për këtë çështje.
Përtej një nervozizmi të përgjithshëm në lidhje me zgjerimin, integrimi mund të pengohet edhe nga shtete anëtare individuale me mosmarrëveshje specifike dypalëshe me një kandidat, siç ka qenë rasti midis Maqedonisë së Veriut dhe anëtarëve të BE-së, Greqisë dhe Bullgarisë. I pyetur nëse mund të ketë disa shtete anëtare që kundërshtojnë konkretisht pranimin e Shqipërisë, Mazi tha: Mendoj se ka, megjithëse këto nuk e thonë hapur; ajo që disa thonë publikisht është e ndryshme ose edhe e kundërta me atë që thonë në takimet e mbyllura të BE-së./BIRN
U arrestua pas sherrit me shoferin e kamionit! Lirohet vëllai i Bledion Nallbatit: Ai s'është kapo, por kapedan
KORÇË-Vëllai i kandidatit të Partisë Demokratike për Qarkun e Korçës, Bledion Nallbati është lënë në detyrim paraqitje. Alti Nallbati u arrestua pasi së bashku me vëllain e tij u përfshi në një sherr fizik me një shofer kamioni në Bilisht. Ndaj 42-vjeçarit, rëndojnë veprat penale "Dëmtime të tjera me dashje", "Prishja e qetësisë publike", dhe " Pengimi i qarkullimit të mjeteve të transportit".
Njoftimi i gjykatës:
Në Gjykatën e Shkallës së Parë e Juridiksionit të Përgjitshëm Korçë, u zhvillua sot në datën 06.05.2025 ora 12.30 seanca me objekt: "Vleftësim arrestimi në flagrancë, caktimin e masës së sigurimit "Detyrim per t'u paraqitur në policinë gjyqësore" ndaj shtetasit A.N i dyshuar për kryerjen e veprave penale "Prishja e qetësisë publike", dhe "Pengimi i qarkullimit të mjeteve të transportit" parashikuar nga nenet 274/1 dhe 293 të Kodit Penal.
Pas vendimit të Gjykatës së Korçë, deputeti i Partisë Demokratike, Bledjon Nallbati përsëriti akuzat, ku cilësoi prokuroren e çështjes si ish-vartëse të ministrit Niko Peleshi, duke thënë se kjo është një çështje e inskenuar me urdhër politik. Ai u shpreh se kryeministri Rama e përdori këtë ngjarje për të shmangur përgjegjësinë për keqqeverisjen dhe për të devijuar vëmendjen publike gjatë vizitës së tij në Devoll.
"Unë i pyes prokuroren dhe gjyqtaren, a ma justifikojnë dot pse me urdhrin e drejtorit të policisë, u delegua që kjo çështje të punohej në Korçë, ndërsa kompetencat i ka komisariati i Devollit. Unë e kuptoj, drejtori i policisë, Niko Peleshi janë eunukë të paburrë që marrin urdhra dhe zbatojnë urdhra të verbër nga shefi i tyre Edi Rama. Nuk e kam këtë deklaratë me ata, do ua jap ligjërisht. Ky rast sapo ka filluar. Kanë marrë në qafë një polic që ka firmosur me urdhër. E ftoj atë djalë të shkojë pa qenë nevoja ta çoj unë, dhe pse unë do e çoj në SPAK dhe kudo tjetër. Të tregojë pse e bëri një gjë që nuk i takon,"-deklaroi deputeti.
Nallbati një përgjigje e kishte edhe për kryeministrin, duke thënë se nuk trembet nga inskenime të tilla dhe duke mbrojtur vëllain e tij si “kapedan” që ndihmon qytetarët. Rama në një takim me qytetarët në Devoll, e quajti kandidatin demokrat “rrugaç”, pasi ky i fundit u përfshi në një sherr fizik me një shofer kamioni në Bilisht.
"Sot dua t’i them Edi Ramës, këtij skërfyelli 2 metra të gjatë, hajdutit më të gjatë që ka njohur politika, që nuk më tremb me këto inskenime. E di që je djali i Kristaqit dhe nipi i Spiros që jo vetëm kanë burgosur njerëz, por i kanë varur në litar. Pas 11 majit ti do shërbesh si gallof për të trembur zogjtë në ara, por as atë nuk do e bësh se do jesh në burg se do marrësh përgjigjen nga shqiptarët. Unë dhe vëllai im nuk trembemi. Erdhe në Devoll dhe the që vëllai im është kapo, ai nuk është as gjysmë metri i gjatë dhe as kapo. Ai është kapedan, sepse pret e përcjell këdo dhe i ndihmon me çfarë mundet, ndërsa vëllai yt akuzohet nga agjencitë ndërkombëtare të inteligjencës si trafikant i kokainës në Shqipëri,"-u shpreh Nallbati.
REAGIMI:
Prokurorja, ish vartëse e Niko Peleshit i cili u mor personalisht në falsifikimi ne kësaj akuze tha para gjykatës që nuk i ka parë pamjet por thotë se kërkon një masë sigurie dhe vlerësoi si të drejtë arrestimin në flagrancë. Gjyqtarja u bë pjesë e kësaj maskarade politike dhe këtij inskenimi. E dëgjuat dje kryeministrin Rama në Devoll. Erdhi për të kërkuar votën, foli një orë e ca dhe nuk përmendi asgjë çfarë ka bërë për zonën, as për të ardhmen, por u mor vetëm me këtë rast. Kjo u inskenua që Rama të shmangte përgjegjësinë e tij për keqqeverisjen dhe të merrej me këtë tallava. Unë i pyes prokuroren dhe gjyqtaren, a ma justifikojnë dot pse me urdhrin e drejtorit të policisë, u delegua që kjo çështje të punohej në Korçë, ndërsa kompetencat i ka komisariati i Devollit. Unë e kuptoj, drejtori i policisë, Niko Peleshi janë eunukë të paburrë që marrin urdhra dhe zbatojnë urdhra të verbër nga shefi i tyre Edi Rama. Nuk e kam këtë deklaratë me ata, do ua jap ligjërisht. Ky rast sapo ka filluar. Kanë marrë në qafë një polic që ka firmosur me urdhër. E ftoj atë djalë të shkojë pa qenë nevoja ta çoj unë, dhe pse unë do e çoj në SPAK dhe kudo tjetër. Të tregojë pse e bëri një gjë që nuk i takon. Sot dua t’i them Edi Ramës, këtij skërfyelli 2 metra të gjatë, hajdutit më të gjatë që ka njohur politika, që nuk më tremb me këto inskenime. E di që je djali i Kristaqit dhe nipi i Spiros që jo vetëm kanë burgosur njerëz, por i kanë varur në litar. Pas 11 majit ti do shërbesh si gallof për të trembur zogjtë në ara, por as atë nuk do e bësh se do jesh në burg se do marrësh përgjigjen nga shqiptarët. Unë dhe vëllai im nuk trembemi. Erdhe në Devoll dhe the që vëllai im është kapo, ai nuk është as gjysmë metri i gjatë dhe as kapo. Ai është kapedan, sepse pret e përcjell këdo dhe i ndihmon me çfarë mundet, ndërsa vëllai yt akuzohet nga agjencitë ndërkombëtare të inteligjencës si trafikant i kokainës në Shqipëri.
Incidenti ndodhi mbrëmjen e 3 majit, ku deputeti i PD Bledion Nallbati dhe vëllai i tij, Alti Nallbati u konfliktuan me një shofer kamioni. Shkak i konfliktit u bë një aksident, i cili nuk ndodhi. Në pamjet e sigurara deputeti i PD së bashku me vëllain e tij, fillimisht debatojnë verbalisht e më pas konfliki agravon edhe në përplasje fizike. Në një reagim të tij, Nallbati ka pranuar se është përfshirë në sherr dhe deklaron se ka tentuar disa herë që të shmangë përplasjen, por emocionet dhe sjellja e drejtuesit të kamionit bënë të vetën. Sipas tij pamjet e publikuara nuk janë të plota dhe mjeti me të cilin udhëtonin mund të ishte përplasur me kamionin, pasi shoferi i mjetit të tonazhit të rëndë ishte me shpejtësi. Deputeti sqaron se në këtë moment kanë zbritur nga makina dhe sipas tij edhe shoferi i ka sharë vëllain./ZËRI
Kandidati i ‘Shqipërisë Madhështore’ pengohet për fushatën në Shkozë, procedohet 42-vjeçarja
TIRANË- Një incident ka ndodhur gjatë një aktiviteti elektoral, ku kandidati i subjektit politik “Shqipëria Madhështore”, Rivelino Cuno ka bërë një raportim në Polici duke pretenduar se është penguar të zhvillojë fushatën e tij në Shkozë. Pas kallëzimit të tij, një 42-vjeçare është shoqëruar dhe më pas është proceduar në gjendje të lirë. Kjo pasi, sipas kallëzimit ka ofenduar pjesëmarrësit për shkak të shqetësimit nga zhurmat pranë banesës së saj, pa qenë në dijeni për natyrën e aktivitetit.
Policia po vijon veprimet për dokumentimin e plotë të ngjarjes.
NJOFTIMI I POLICISË:
-Pasditen e djeshme, shtetasi R. C., 38 vjeç, kandidat për deputet i një subjekti politik, ka njoftuar Policinë se ishte penguar gjatë aktivitetit të tij elektoral, në Shkozë. Shërbimet e Policisë kanë kryer veprimet për rastin dhe kanë shoqëruar në komisariat, shtetasen Sh. S., 42 vjeçe, banuese në Shkozë, e cila ka deklaruar se i ka ofenduar pjesëmarrësit në këtë aktivitet pasi ishte shqetësuar nga zhurmat e krijuara afër pallatit ku ajo banon dhe se nuk e ka ditur arsyen e këtij aktiviteti./ZËRI
Publikoi në “TikTok ” fletën e votimit të plotësuar, e ‘pëson’ 24-vjeçari shqiptar, Policia nis hetimin
GJERMANI- Një i ri shqiptar, banues në Gjermani është proceduar pas publikimit të fletës së votimit. 24-vjeçari publikoi në rrjetin social “TikTok”, një fotografi të fletës së votimit (të plotësuar) që e ka siguruar nëpërmjet shërbimit postar, duke qenë se është emigrant në Gjermani.
Policia sqaron se nisi procedimi në gjendje të lirë, për veprat penale “Shkelja e fshehtësisë së votimit” dhe “Shkelja e së drejtës së zgjedhjes”, për shtetasin E. N., 24 vjeç. I riu është bërë personi i parë që procedohet në lidhje me shkeljet e rregullave sa i përket procesit të votimit nga diaspora.
Vetë kreu i Komisionit Qendror të Zgjedhjeve, Ilirjan Celibashi në një nga konferencat për gazetarët ka theksuar se publikimi i votës është një vepër penale që dënohet nga ligji zgjedhor. Komisioneri u ka bërë thirrje partive politike që të mos inkurajojnë këto veprime te votuesit e tyre.
'Tej interesit të partive politike, entuziazmit që kanë për të treguar se për kë votojnë është e dënueshme nga Kodi Penal deklarimi i votës. Në mënyrë kategorike nuk duhet të publikojnë në rrjetet sociale përmbajtjet e fletëve të votimit sepse janë duke kryer një vepër penale”, deklaroi kreu i KQZ-së.
Njoftimi i policisë:
Specialistët e Seksionit për Hetimin e Krimit Ekonomik dhe Financiar referuan materialet në Prokurori, ku nisi procedimi në gjendje të lirë, për veprat penale “shkelja e fshehtësisë së votimit” dhe “shkelja e së drejtës së zgjedhjes”, për shtetasin E. N., 24 vjeç, pasi ka publikuar në rrjetin social “TikTok”, një fotografi të fletës së votimit (të plotësuar) që e ka siguruar nëpërmjet shërbimit postar, duke qenë se është emigrant në Gjermani./ZËRI
Krimet zgjedhore/ SPAK dhe BKH sërish në Elbasan, takim me prokurorët dhe shefat e policisë
ELBASAN-SPAK dhe BKH po zhvillojnë një takim në Prokurorinë e Elbasanit në kuadër të parandalimit të krimeve zgjedhore. Të pranishëm janë kryeprokurori Kreshnik Ajazi dhe prokurorë të tjerë, drejtori i policisë së qarkut të Elbasanit, Fatmir Hoxha dhë nëndrejtori si dhe shefat e komisariateve.
Grupi i monitorimit, i kryesuar nga prokurori Ols Dado është duke ndjekur zhvillimet në terren në kohë reale dhe hetuesit po përdorin pajisje me teknologji të avancuar për të dokumentuar çdo shkelje që mund të ndodhë gjatë këtij procesi elektoral.
Kujtojmë se pak ditë më parë dhjetëra agjentë të Byrosë Kombëtare të Hetimit (BKH), prokurorë specialë të Prokurorisë së Posaçme (SPAK) zbarkuan në qytetin e Elbasanit. Angazhimi i organeve ligjzbatuese ka për qëllim garantimin e pastërtinë e procesit zgjedhor të 11 Majit./ZËRI
Krimet Zgjedhore, SPAK: Kanë ardhur 115 kallëzime nga qytetarët, partitë dhe Policia
TIRANË- Stuktura e Posaçme kundër Korrupsionit dhe Krimit të Organizuar ka bërë me dije ‘bilancin’ e krimeve zgjedhore deri më datë 5 maj. Gjatë kësaj fushate zgjedhore, SPAK bën me dije se në total kanë marrë 115 kallëzime në total, të depozituara si nga partitë politike, ashtu edhe nga Policia, por edhe nga qytetarët. Ndër to, 35 raste që janë iniciuar edhe nga vetë Prokuroria e Posaçme. Nga 115 kallëzime të depozituara, siç bën me dije SPAK, 8 prej tyre janë të regjistruara kryesisht.
Janë regjistruar 115 materiale kallëzuese, ku përfshihen:
•Kallëzime nga subjekte politike
• Referime nga Policia e Shtetit
• Të iniciuara kryesisht nga Struktura e Posaçme kundër Korrupsionit dhe Krimit të Organizuar
• Denoncime nga Platforma Online
• Denoncime nga qytetarët
• Materialet kallëzuese nga subjektet politike janë 25.
• Në platormën online kanë mbërritur 35 materiale kallëzuese
• Janë regjistruar 35 procedime penale.
• Dhe nga këto procedime, 8 prej tyre janë të regjistruara kryesisht - dmth të iniciuara nga SPAK.
BKH dhe SPAK, por edhe Prokuroria e Përgjithshme, janë duke monitoruar gjithçka në këtë proces zgjedhor duke filluar nga përdorimi i burimeve publike, abuzimi me administratën, qarkullimi i parave të pista, ndikimi i krimit të organizuar dhe çdo tentativë për blerje votash./ZËRI
Fushata 2025/ WSJ zbulon sesa paguhet Chris LaCivita: Merr më shumë se 1 mln dollarë! Strategu: Shifrën e thotë vetë PD pas zgjedhjeve
TIRANË- Në një mbrëmje në Tiranë, kryeqytetin e Shqipërisë, një amerikan eci mes një turme të zhurmshme prej mijëra vetash, u ngjit në skenë dhe bëri një pyetje: Kush është gati ta bëjë Shqipërinë Madhështore?
Ai amerikan ishte Chris LaCivita, një nga arkitektët e rikthimit politik të Donald Trump në vitin 2024 pas dhjetëra akuzave penale. Ai tani po përpiqet ta përsërisë këtë strategji për Sali Berishën, një ish-kryeministër në vendin ballkanik, i cili vetë përballet me akuza për korrupsion dhe është sanksionuar nga SHBA-ja. Si udhëheqës i partisë opozitare, Berisha është sërish në garë për t'u bërë përsëri kryeministër nëse partia e tij fiton shumicën në zgjedhjet parlamentare të 11 majit.
Në Shqipëri, LaCivita ka folur në tubime të mëdha, ka ndihmuar në dizajnimin e reklamave televizive, ka marrë pjesë në disa thirrje video në "Zoom" me mijëra shqiptarë dhe ka fluturuar drejt Shqiërisë në tre raste duke u shfaqur në ngjarje të ndryshme publike; por edhe është bërë një shënjestër për kundërshtarët e Berishës. Megjithatë ai vazhdon takimet nga zyra e tij në Virxhinia. Gjatë këtij procesi, ai është bërë një figurë çuditërisht qendrore në vendin me rreth 2.7 milion banorë.
"Ka një pjesë të elektoratit në Shqipëri që më pëlqen dhe një pjesë të elektoratit që nuk më pëlqen,"- tha LaCivita me të qeshur në një intervistë të kohëve të fundit. LaCivita mori famë si bashkëmenaxheri i fushatës së Trump për vitin 2024. Ndërsa shumë zyrtarë të fushatës iu bashkuan administratës, LaCivita ka guxuar të shkojë jashtë vendit që kur Trump fitoi postin si presidentin, duke kërkuar "punë" nga Australia në Shqipëri. Ai gjithashtu ka rekrutuar disa ish-këshilltarë të tjerë të Trump për të ndihmuar në fushatën që po zhvillon në Shqipëri. Këtu përfshihet Paul Manafort, menaxheri i fushatës së Trump për vitin 2016 dhe Tony Fabrizio, anketuesin e fushatës për vitin 2024. Berisha ka punësuar gjithashtu "Continental Strategy", një firmë lobimi që punësoi vajzën e shefes së stafit të Trump, Susie Wiles, për të lobuar për heqjen e sanksioneve që i janë vendosur nga Departamenti Amerikan i Shtetit. Nga të përzgjedhurit e LaCivita-s, Manafort vuajti dënimin me burg për mashtrim me tatimet në lidhje me punët e tjera si konsulent politik jashtë vendit, por dënimi iu fal nga Trump. Lidhur me punën që kanë marrë përsipër të kryejnë në Shqipëri, Manafort dhe Fabrizio nuk iu përgjigjën kërkesave për komente.
Konsulentët politikë amerikanë në të dyja partitë kanë këshilluar prej kohësh në fushata të huaja. Por edhe demokratët nuk janë pas! James Carville, punoi në Peru, Kolumbi, Greqi, Honduras dhe Ekuador, e në shumë vende të tjera.
"Ekziston një shprehje në konsulencën politike amerikane, 'sa më i varfër vendi, aq më e madhe pagesa'. Më pëlqente të bëja punën time, të udhëtoja dhe të fitoja një ose dy shekel (monedhë izraelite që në këtë rast nënkupton të fitoja para)," tha Carville. Carville tha se konsulenca e huaj ishte gjithashtu më pak e rrezikshme politikisht, duke pasur parasysh se pak amerikanë i kushtonin vëmendje fushatave të huaja.
"Nëse humbet, sillesh sikur ke pasur grip dhe ke qenë jashtë për pak kohë,"- tha ai.
Në Shqipëri, akuzat për korrupsion e kanë ndjekur prej kohësh Berishën, një mjek konservator, i cili ishte kryeministër nga viti 2005 deri në vitin 2013 dhe drejton partinë opozitare. Administrata Biden e sanksionoi atë në vitin 2021 dhe ia ndaloi vizitat në SHBA. Sekretari i Shtetit Antony Blinken tha në atë kohë se Berisha kishte ndihmuar në përvetësimin e fondeve publike dhe kishte përdorur pushtetin e tij për të pasuruar aleatët dhe anëtarët e familjes së tij. Po ashtu, Berisha u akuzua zyrtarisht në Shqipëri për korrupsion vitin e kaluar dhe përballet me akuza se e ndihmoi dhëndrin e tij të privatizonte tokë në kryeqytet për të ndërtuar apartamente. Ai kaloi disa muaj në "arrest shtëpie" por sërish mbante fjalime para mbështetësve të tij nga banesa e tij. Ai i ka quajtur akuzat "gënjeshtra" dhe një përpjekje të kundërshtarëve të tij për hakmarrje politike. Nga ana tjetër, kryeministri aktual, Edi Rama, kryeson Partinë Socialiste dhe po kandidon për rizgjedhje.
Tani gara ka një rregull të ri; ka një ligj që lejon shqiptarët që kanë ikur jashtë vendit të votojnë. Berisha është përpjekur të përqendrohet te largimet nga vendi si një arsye se përse Rama duhet rrëzuar. Ndërsa Rama ka përdorur vazhdimisht rolin e LaCivitës për të sulmuar Berishën, duke përfshirë edhe shpërndarjen e reklamave kundër LaCivitës. LaCivita e krahasoi situatën me ndjekjet penale të Trump.
“Të njëjtët njerëz që bënë lëvizje të ngjashme kundër Donald Trump, gjurmët e tyre të gishtërinjve janë kudo,”- tha LaCivita në intervistë.
Ai nuk pranoi të thoshte se sa po paguhej, por tha se ishte “në përputhje me një fushatë politike kombëtare” dhe se shifra e paguar për të do të zbulohej nga partia shqiptare pas zgjedhjeve. Ekspertët e njohur me punën e qeverisë së huaj thanë se kontrata ka të ngjarë të ketë vlerë më shumë se 1 milion dollarë.
LaCivita po menaxhon fushatën e Berishës, ndërsa punon gjithashtu me super PAC të Presidentit Trump, Komitetin Kombëtar Republikan dhe Ndërtimin e së Ardhmes së Amerikës, një grup që është mbështetur nga Elon Musk. Disa konsulentë politikë amerikanë që punojnë jashtë vendit e kanë regjistruar punën në përputhje me Aktin e Regjistrimit të Agjentëve të Huaj amerikanë, e po ashtu duhet të deklarojnë se çfarë disktojnë për fushatat jashtë vendit. LaCivita, i cili është parë rregullisht duke u takuar me Trump dhe këshilltarët e presidentit, tha se nuk i ka kërkuar asgjë Trump.
"Nuk po përpiqem të ndikoj te politikanët amerikanë. Aktivitetet e mia janë përqendruar tërësisht në Shqipëri,"- tha ai.
LaCivita tha se do të donte të merrte më shumë klientë të huaj, por do të ishte i kufizuar vitin e ardhshëm për shkak të punës së tij me politikanët amerikanë në zgjedhjet e mesit të mandatit. Shumica e mesazheve të LaCivitës në Shqipëri për Berishën kanë pasqyruar Trumpin. LaCivita fajësoi Ramën për rritjen e çmimeve dhe krimit por u përqendrua edhe te inflacioni.
“Në vitin 2024, socialistët u përpoqën ta burgosnin Donald Trumpin. Ata dështuan. Në vitin 2025, këtu në Shqipëri, socialistët duan të burgosin të gjithë opozitën e tyre. Ata do të dështojnë,”-tha ai në një tubim muajin e kaluar, me një përkthyes që ia thoshte fjalët turmës prej mijëra vetash, shumë prej të cilëve valëvitnin flamuj amerikanë.
Një ditë pas tubimit, ai fluturoi me Berishën për në Milano të Italisë, duke shpresuar të tërhiqte disa nga votuesit shqiptarë që jetonin jashtë vendit.
"Ka pasur probleme me përkthimin herë pas here,"- tha LaCivita, duke iu referuar ndryshimit të sloganeve të Trumpit në gjuhën shqipe.
“Nuk ka një përkthim të shkëlqyer për “Make Albania Great Again. Pra, është më shumë si të punosh për ta bërë Shqipërinë madhështore,”-e mbylli ai.
Marrë dhe përkthyer nga Wall Street Journal
Lezhë/ Incidenti mes Euroatlantikëve të Bashës dhe zyrtarëve të PS, vihet nën hetim 38-vjeçari!
LEZHË- Policia e Lezhës ka vënë nën hetim një 38-vjeçar pas incidentit të ndodhur mbrëmjen e së hënës mes anëtarëve të Koalicionit Euroatlantik dhe atyre të Partisë Socialiste. Zëvendës kryetari i Bashkisë së Lezhës, Fatjon Zefi ka bërë një kallëzim në Polici me pretendimin se 38-vjeçarin se ka penguar lëvizjen e automjetit të tij në fshatin Kolsh për motive politike.
Ndaj 38-vjeçarit rëndojnë akuzat për veprat penale “Prishja e qetësisë publike”, “Pengimi i qarkullimit të mjeteve të transportit” dhe “Kanosja apo dhunimi ndaj pjesëmarrësve në zgjedhje”,
“Shërbimet e Komisariatit të Policisë Lezhë referuan materialet në Prokurori, ku nisi procedimi në gjendje të lirë, për veprat penale “Prishja e qetësisë publike”, “Pengimi i qarkullimit të mjeteve të transportit” dhe “Kanosja apo dhunimi ndaj pjesëmarrësve në zgjedhje”, për shtetasin Gj. P., 38 vjeç, banues në fshatin Kolsh, pasi ka kallëzuar shtetasi F. Z., me detyrë Zëvendëskryetar i bashkisë Lezhë, se 38-vjeçari, për motive që lidhen me fushatën elektorale, ka penguar me automjetin e tij, lëvizjen e mjeteve në fshatin Kolsh,”-bën me dije Policia.
Celibashi rendit problematikat: 21 mijë zarfe nuk janë dorëzuar, për Greqinë kemi marrë masa
TIRANË- Kryekomisioneri Ilirjan Celibashi ka deklaruar se afro 11 mijë emigrantë kanë pasur probleme me adresën dhe se rreth 21 mijë zarfe nuk janë dorëzuar. Në deklaratën për mediat nga zyrat e KQZ-së, Celibashi tha se pavarësisht këtyre detajeve, procesi ka shkuar shumë mirë deri më tani.
“Rreth 21 mijë zarfe nuk janë dorëzuar dhe afro 11 mijë emigrantë kanë pasur probleme me adresën. Nuk mund të vihet në dyshim integriteti i votimit nga jashtë, është proces që nuk është realizuar në mënyrë perfekte, por e them pa hezitim është realizuar shumë mirë. Me gjithë respektin për standardin e zgjedhjeve në Gjermani, por atje u raportua humbja e 40 mijë votave apo problemet që patën në Austri ku pati problematika me zarfin pasi ishin të hapur. Sistemi ka funksionuar edhe pse është përgatitur në kohë të shkurtër, nuk e ka bërë askush këtë që kemi bërë ne. Ka shumë aspekte,”- u shpreh kreu i KQZ-së.
I pyetur për denoncimin e Partisë Demokratike që publikoi fotot e fletëve të votimit të hedhura në trotuar, Celibashi tha se janë marrë masat për çdo fakt të paraqitur.
“Unë kam gjithë respektin për të gjitha partitë politike, ajo që ka rëndësi se për faktet që janë paraqitur ne kemi marrë masat. Mua nuk më vjen në mendje se çfarë duhet të bëjmë, nëse një zgjedhës nuk e ka marrë fletën e votimit, duhet ta denoncojë. Ky zgjedhës apo partitë të paraqesin faktin. Tej kësaj, nuk e di si ne si institucion apo strukturat e tjera mund të operojmë. Nuk është se ne kemi një fakt dhe nuk e kemi adresuar. Kini durim të presim deri në orën 19:00 të së Dielës, nuk mund të paragjykojmë procesin,”- tha Celibashi.
A bashkohesh me Tom Doshin? Rama përgjigjet shkurt: Nuk marrim njeri në prehër!
TIRANË- Kryeministri Edi Rama u pyet për bashkëpunimin pas zgjedhjeve parlamentare të 11 majit me Partinë Socialdemokrate të drejtuar nga Tom Doshi. Në fjalën e tij, i ftuar në emisionin “Të Paekspozuarit”, Rama u përgjigj shkurt dhe prerë. Për të, i vetmi bashkim që ka bërë është me votat e shqiptarëve dhe se nuk ka ndërmend që të bashkohet me askënd tjetër.
“Ne nuk do të bashkohemi me askënd, sepse ne jemi të bashkuar me shumicën e shqiptarëve se është zgjidhur kjo që në 2017. Nuk kemi nevojë të marrim njeri në prehër dhe pastaj të na thonë ose na ushqe ose do të lëviz timonin dhe do të hedh,”- tha Rama.
Ndërkohë që vetëm pak ditë më parë, nga Korça, Doshi tha se është i gatshëm që të bashkëpunojë vetëm me Partinë Socialiste pas 11 majit./ZËRI
Kandidati i PD në Lezhë, Gjin Gjoni vihet nën hetim
LEZHË-Policia e Lezhës ka nisur hetimin për shpifje në gjendje të lirë për kandidatin e Partisë Demokratike në Lezhë, Gjin Gjoni. Ky i fundit publikoi në rrjetin social Facebook emrat e 5 përfaqësuesve të Partisë Socialiste dhe i akuzoi se ata po blejnë vota dhe po intimidojnë zgjedhësit.
POSTIMI I GJIN GJONIT:
Denoncim publik: Kriminelët elektoral janë aktivizuar – Drejtësia të veprojë me urgjence! Me afrimin e datës së zgjedhjeve, po shfaqen gjithnjë e më hapur elementë që po përpiqen të deformojnë vullnetin e qytetarëve përmes blerjes së votës. I bëj thirrje publike SPAK dhe organeve të drejtësisë të veprojnë menjëherë ndaj këtyre personave, për të shmangur përplasjet dhe tensionet që mund të lindin. Ne nuk do të lejojmë që demokracia të nëpërkëmbet – kushdo që do tentojë të prekë votën e lirë do të na ketë përballë!
Njerez nga vetë Partia Socialiste me informojnë se këta janë disa prej emrave që janë pjesë e përpjekjeve për blerje votash dhe intimidim të qytetareve:
• Denis Pervathi – Drejtor i Tatimeve në Bashkinë Lezhë po vepron në Kolsh
• Eraldo Smaçi – Drejtor i IVMT në Bashkinë Lezhë po vepron në Zejmen
• Paulin Gjergji – Drejtor i Emergjencave në Bashkinë Lezhë po vepron në Balldre
• Rigels Nicaj – Zyrtar i Partisë Socialiste po vepron në Ishull-Lezhë
• Fred Pervathi – Shofer ambulance po vepron në Manati
• Agim Prendi – Zyrtar i PS po vepron në Zejmen
• Emirjan Lazri – Drejtor i Inspektoriatit Shëndetësor po vepron në Dajç
Këta individë dhe të tjerë që do ti denoncojmë me zë dhe figure më ditet në vijim duhet të hetohen pa vonesë dhe të vihen para drejtësisë, pasi ne jemi të vendosur që vullneti i qytetareve të mos tjetersohet siç ka ndodhur në zgjedhjet e shkuara”, shkruante Gjin Gjoni më 4 maj.
Rasti u denoncua nga kreu i PS në Lezhë Ermal Pacaj, teksa bëri me dije se gjatë fushatës elektorale, Gjoni ka përhapur akuza të pabazuara ndaj drejtuesve të PS në zona të ndryshme, përfshirë disa drejtues shtabesh.
Njoftimi i policisë:
Shërbimet e Komisariatit të Policisë Lezhë referuan materialet në Prokurori, ku nisi procedimi në gjendje të lirë, për veprën penale “Shpifja”, për shtetasin Gj. Gj., 55 vjeç, banues në Lezhë, kandidat për deputet i subjektit politik “Partia Demokratike”, pasi kanë kallëzuar shtetasit D. P., E. L., E. S., P. Gj. dhe R. N. (përfaqësues dhe simpatizantë të subjektit politik “Partia Socialiste”), se 55-vjeçari ka publikuar në rrjetin social “Facebook”, një postim, nëpërmjet të cilit shpif se 5 shtetasit janë të implikuar në blerje votash dhe intimidim zgjedhësish.
Hetimi ndaj tij vjen në një kohë kur fushata në Lezhë është e tensionuar. Kandidati i Partisë Socialiste në qarkun e Lezhës, Ermal Pacaj ka depozituar një kallëzim në Policinë e Lezhës, pasi pretendon se njerëz të Partisë Demokratike kanë kërcënuar me armë babain e kandidates së Partisë Socialiste, Klotilda Ndreca.
Në lidhje me rastin vetë kandidati për deputet i Partisë Demokratike në Qarkun e Lezhës, Gjin Gjoni zbuloi se opozita, edhe në këto zgjedhje, ka ngritur ekipe vullnetare për të mbrojtur votën. Në një prononcim para mediave, Gjin Gjoni tha se dje kishin marrë informacione se po zhvilloheshin takime, ndaj edhe kishin shkuar në terren, duke theksuar se nuk ka pasur në asnjë moment armë zjarri. Po ashtu, pretendon se së fundmi qytetarët po dërgojnë pranë tij informacione lidhur me krimet zgjedhore që sipas tij kanë gjetur terren në Lezhë./ZËRI
Kandidati i PD-së në Dibër denoncon në SPAK kryetarin e bashkisë Peshkopi dhe dy zyrtarë: Janë çyrykë…
TIRANË-Kandidati për deputet i PD-së, Xhemal Gjunkshi, është paraqitur mëngjesin e sotmë në SPAK. Ai ka kallëzuar në Prokurorinë e Posaçme, kryetarin e bashkisë së Dibrës, Rahim Spahiu, drejtorin e shërbimeve Bedri Kamberi dhe kryetarin e Njësisë Administrative Luzni, Labinot Murrja.
Kandidati i PD u shpreh se në kundërshtim më ligjin Bashkia asfalton rrugët, ndërsa bëjnë presion dhe përdorin asetet publike në kohë fushate. Ai po ashtu denoncoi se ushtrohet presion ndaj qytetarëve të Dibrës dhe ndaj administratës.
'Sapo dola nga SPAK, ku denoncova Kryetarin e Bashkisë Peshkopi, Rrahim Spahiun, Drejtorin e Shërbimeve të Bashkisë, Bedri Kamberin, Kryetarin e Njësisë Administrative Luzni, Labinot Murrja, për krime zgjedhore. Këta njerëz në shkelje të ligjit, duke shkelur kodin zgjedhor hapën rrugë në fshatin Luzni. Këta njerëz janë çyrykët e vërtetë të Dibrës, që së bashku me Çyryk Ramën, do marrin përgjigje nga dibranët, vetëm pas pak ditësh. 4 me 1 do ia bëjmë rilindjes. I bëj thirrje banorëve të Dibrës, të mos friksohen nga presionet e kriminelëve zgjedhorë. Të denoncojnë kur kërcënohet. Unë zotohem se do jem krah çdo njeriu që denoncon krimet zgjedhore. Shqipëria Madhështore nuk ka kthim. Shqipëria Madhështore do të bëhet,"-u shpreh Gjunkshi.
Debati në Facebook përfundon në Prokurori! Anduel Xhindi kallëzon Belind Këlliçin: Drejtësia të bëjë punën!
TIRANË-Ish-deputeti dhe zyrtari i lartë i PS, Anduel Xhindi ka depozituar kallëzim penal në Prokurorinë e Fierit kundër Belind Këlliçit, duke e akuzuar për dy vepra të rënda penale.
Përplasja mes Anduel Xhindit dhe Belind Këlliçit ka nisur ditë më parë, kur politikani demokrat ndau një foto të Xhindit në fushatë dhe e akuzoi se si drejtues i “Illyrian Guard” ai po shkelte ligjin. Më anë të një postimi në Facebook, Xhindi shprehet se ka ndërmarrë hapa ligjor. Ish-deputeti socialist thotë se për të shmangur çdo keqkuptim dhe për transparencë të plotë, ndan publikisht dokumentin e lirimit të tij nga detyra në “Illyrian Guard”, në vitin 2024 për arsye personale.
"Fjalët i merr era, por përballja me shpifjen kërkon përgjegjësi. Për këtë arsye, kam depozituar një kallëzim penal për shpifje ndaj z. Këlliçi. Tashmë, drejtësia do të bëjë punën e saj. Jam i habitur se si figura publike dhe kandidat që duan të përfaqësojnë qytetarët në Parlamentin e Shqipërisë mund të shprehen me kaq pak kujdes dhe etikë, pa verifikuar asgjë më parë. Vaj medet çfarë mund të bëjë me qytetarët Belo,-thuhet në reagimin e tij.
Në fakt Belind Këlliçi e kishte gabim sepse Anduel Xhindi është larguar prej javësh nga kompania shtetërore e sigurisë fizike. Kallëzimi mbetet për t’u parë nëse do të klasifikohen si të tilla dhe nga organi i akuzës./ZËRI
