TIRANË- Gjykata e Posaçme Kundër Korrupsionit dhe Krimit të Organizuar (GJKKO) ka caktuar masat e sigurisë për dy të arrestuarit e vrasjes së Klevis Lleshit në gusht të vitit 2020. GJKKO ka vendosur masën e sigurisë "arrest me burg" për 31-vjeçarin Sabah Nuzi, i akuzuar si akzekutori i 24-vjeçarit Klevis Lleshi. Ndërsa Samet Loka është lënë në masën e sigurisë "arrest shtëpie".
Siç u bë me dije më herët edhe nga SPAK, Sabah Nuzi dyshohet të jetë ekzekutori i Klevis Lleshit, për një shumë prej 50 mijë eurosh. Ndërkohë, Aurel Hoxha alias Kolaveri i cili aktualisht vijon të jetë në kërkim, është identifikuar si urdhërues i dyshuar i krimit. Hoxha është pronari i lokalit "Monopol", ku janë ushtruar kontrolle gjatë orëve të para të mëngjesit të djeshëm.
Sabah Nuzi është arrestuar edhe më parë nga blutë e Matit më vitin 2012, pasi ka qëlluar me armë zjarri 3 shtetas, të cilët u plagosën rëndë. Të plagosur mbetën Arbër Mata, Martin Rica dhe Gjokë Rica. Sipas informacioneve të Policisë sherri nisi pas një konflikti për motive të dobëta.
Si nisi hakmarrja?
Gjithçka nisi në Britaninë e Madhe, ku pas një sherri që dyshohet për pazare droge u vra Agim Hoxha. Vrasësi i tij ishte Arben Lleshi. Hoxha dhe Lleshi kishin një miqësi të hershme së bashku, e cila datonte që prej fëmijërisë së tyre, por u kris. Shkak dyshohet të jenë bërë pazaret e drogës. Agim Hoxha u vra në Britaninë e Madhe dhe më pas trupi iu dogj brenda makinës.
Autoritetet britanike e gjetën fajtor Lleshin për ngjarjen dhe e dënuan me 32 vite burg. Pas ekstradimit drejt Shqipërisë, ai kishte për të kryer dhe 28 vite të mbetura, të cilat nuk i çoi deri në fund pasi u ekzekutua nga Sokol Mjacaj.
Pavarësisht se drejtësia e tha fjalën e saj, familja Hoxha kishte tjetër skenar në mendje. Të niste hakmarrjen, e cila kishte regjistruar deri atëherë të paktën 4 viktima.
Në vitin 2013 u vra Xhavit Lleshi. Atij iu bë pritë në vendin e quajtur ‘Pujkë’. Më 15 maj të vitit 2016 u vra Hajredin Lleshi, vëllai i Xhavitit, në fshatin e lindjes në Burrel. Goditjet nga familja Hoxha vijuan dhe një vit më vonë. Në vitin 2017 u rrëmbye Artan Lleshi, djali i Hajredinit, të cilin e morën me një makinë në Burrel dhe e sollën në Kamëz. Në Kamëz, ai u pa për herë të fundit nga kamerat e sigurisë së një lokali dhe që nga ajo kohë nuk dihet se çfraë ka ndodhur me të.
Hakmarrjet vijuan. Me Arben Lleshin në burg, familja Hoxha priti që Klevis Hoxha, djali i Xhavit Lleshit, të ekzekutuar në vitin 2013 të rritej dhe të vijonin sagën e hakmarrjes. Klevisit, atëherë 22 vjeç i erdhi radha. Klevis Lleshin u zhduk pa gjurmë në vitin 2020. Ai u mor peng në qendër të Burrelit dhe më pas u zhduk. Derisa dy vite më parë eshtrat e tij u gjetën të groposura në Mamurras. Gishtin i fajtorëve në të gjitha rastet u drejtua nga familja Hoxha./ZËRI
