KOLUMBI- Presidenti i Kolumbisë, Gustavo Petro ka akuzuar grupin e Dritan Gjikës, të arrestuar në Emiratet e Bashkuara Arabe se kanë tentuar që ta vrasin. Petro në një postim në rrjetin social 'X', deklaron se ata kanë dashur që t’i bëjnë atentat, por kanë dështuar. Sipas tij grupi kontrollon një rrjet të gjerë prokurorësht dhe portin e Buenaventurës në Kolumbi.
Madje i akuzon se fshihen pas vrasjes së prokurori paraguaian Marcelo Peci, një figurë e njohur në luftën kundër krimit të organizuar dhe trafikut ndërkombëtar të drogës. Peci u ekzekutua më 10 maj 2022 ndërsa ishte me pushime për muajin e mjaltit në ishullin turistik Barú në Kolumbi. Dy persona të armatosur iu afruan në plazh dhe e qëlluan për vdekje në sy të bashkëshortes së tij, e cila ishte shtatzënë në atë kohë
“Ky quhet karteli i trafikut të drogës, me qendër në Abu Dhabi. Ata kontrollojnë një rrjet prokurorësh dhe, nëpërmjet CTI-së, portin e Buenaventurës. Ata janë autorët e vrasjes së prokurorit paraguaian Peci dhe kanë arritur të mbulojnë autorët e vrasjes brenda prokurorisë. Ata kanë tentuar të më bëjnë atentat pa sukses”, shkruan Gustavo Petro.
Bosi shqiptar i kokainës, Dritan Gjika, 48 vjeç, është arrestuar në Dubai për rolin e tij në drejtimin e operacionit të kartelit për të importuar male me kokainë përmes Costa del Sol. Organizata kriminale dyshohet se përdorte biznese të ligjshme, duke përfshirë eksportuesit e bananeve, për të fshehur ngarkesat e kokainës në kontejnerë frutash të destinuar për në portet evropiane.
Arrestimi, i konfirmuar nga autoritetet ekuadoriane më 26 maj 2025, erdhi në kuadër të çështjes 'Pampa', një hetim i përbashkët nga Ekuadori dhe Spanja, ku u zbulua një rrjet përgjegjës për pastrimin e mbi 30 milionë dollarëve përmes kompanive ekuadoriane./ZËRI
